Despues ke Netta Barzilai gano la Eurovision el anyo pasado en Portugal kon su kantika “Toy”, Israel gano el derecho de ser anfitrion (ev sahibi) de Eurovision en el anyo 2019.
Segun las enformasiones de los medios de komunikasion, ay mas de un mez ke el multimilionario israeliano-kanadieno Sylvan Adams estuvo en negosiasiones kon Madonna para ke eya salga a la shena en la Eurovision en Tel Aviv. A la fin, Madonna aksepto la oferta, i estuvieron en akuerdo de darle mas de un milion dolares por esta performansa. La kantadera de 69 anyos, vijito Israel munchas vezes a lo largo de su kariera.
Se espera ke los partisipantes enternasionales van a alkansar a los 10 mil. El numero de turistos ke vijitaron el pais dupliko en los tres anyos ke pasimos. Israel esta pensando ke van a romper el rekor de turizmo en el anyo 2019.
Despues ke Israel gano la Eurovision en el anyo 2018, uvo munchos argumentos politikos. Algunos parlamentarios de Israel se opozaron a la kompetision porke este festival se va azer diya de Shabat. La Union Europeana desido ke kada partisipante deve de ser admitido al pais, independente de la politika de Israel. Munchos kantaderos antisemitas se opozaron a la idea ke Eurovision tenga lugar en Israel.
La kompetision se va azer en el sentro de konvensiones Expo de Tel Aviv. Kuarenta i dos paizes van a embiyar sus artistos ke van a partisipar en la Eurovision.
Antes de la kompetision de 2019, Israel aviya partisipado a la Eurovision kuarenta i una vezes desde su primera partisipasion en el anyo 1973. Israel gano la Eurovision kuatro vezes: en 1973 kon la kantika “A-Ba-Ni-Bi”, en 1979 kon la kantika “Hallelujah”, en 1998 kon la kantika “Diva”, i en 2018 kon la kantika “Toy”.
El primer semifinal del festival se va azer en el 14 de mayo, i el segundo semifinal se va realizar en el 16 de mayo. El grande final se va azer en el 18 de mayo de 2019.
La supermodel Bar Refaeli i los prezentadores de la television, Erez Tal, Assi Azar i Lucy Ayoub van a ser los anfitriones de la kompetision Eurovision 2019.
Israel es el primer pais non evropeo ke va ser el anfitrion de la Eurovision. Esperamos ke la Eurovision 2019 va ser un festival reushido i Israel va profitar de este evento en munchos kampos.
