Diya de lunes tuvimos plazer de estar en Andirne para pueder ser prezentes en la avyertura de una mueva ekspozisyon. Una ekspozisyon de fotografias ande el kurator era muestro amigo, Rubi Asa. El aparejo las informasyones kon fotografias travadas los kinze anyos dalkavo. El sujeto de esta ekspozisyon era: “La Grande Sinagoga d’Andirne; de su destruksyon a su rekonstruksyon”. El famozo fotografo İzzet Keribar era el segundo fotografo ke tomo parte en esta ekspozisyon kompozada de 16 panos i de 34 fotografias. Ya savemos ke la Grande Sinagoga fue fraguada en los anyos 1905-06 despues del Grande Fuego ke okurro en 1905 i ke fue la razon de la destruksyon de las 13 sinagogas ke egzistiyan en la maalle Djudia en “Kaleiçi”. I esta grande komunidad dyo karar de fraguar una sola sinagoga al lugar de las tredje kemadas. Esta sinagoga ke topo sus adeptos en 1906 fue frekuentada apenas setenta-setenta i sinko anyos antes de empesar a derrokarse. La razon era ke este edifisio fue neglijado i ke no fue protejado por la Komunidad d’Estanbol i del Gran Rabinato. I anyos despues ke se derroko i ke su fondasyon fue transferada a la direksyon de las fondasyones, en los anyos 2004-2006 la direksyon ke se topava en la kavesa de la Komunidad Djudia izo esforsos para preparar un proyekto de restorasyon i azerla achetar a la direksyon de las fondasyones.
I este edifisyo kon los dos otros edifisyos ke el primer serviya komo el Midrash i el segundo ke no se saviya kualo era el buto de su konstruksyon, i fue empleado por la primera vez despues de su avyertura en marso del anyo 2015.
En esta ekspozisyon de fotografias los fotografos mos estan amostrando en primero la situasyon de este edifisyo antes ke fue derrokada. I de estas fotografiyas es posivle de ver las kolores ke se topava. I reelmente devemos de felisitar la kompanyia ke restoro este edifisyo i su konsultador (danışman) el arkitekto Rubi Asa. Mizmo oy en diya ay syertas personas ke estan kritikando la restorasyon realizada. Ma kreo ke no tyenen derecho.
Esta ekspozisyon se deve repetar kada tres o kuatro anyos para ke la djente sepa lo ke se puede azer para un edifisio asemejante. Espero de ver mizmo un livro para esta sinagoga ke es una de las mas grandes de la Evropa.
Osman Güneren, Rubi Asa, Silvyo Ovadya, Ahmet Hacıoğlu
Ay un anyo kuando izimos una vijita a İzmir i su doredor estavan avlando de la restorasyon de la Sinagoga de Bergama. I malorozamente les amostri la foto de esta sinagoga ke egzistiya en el livro de Laurenzo Salzman i ke la restorasyon no teniya dingun dar i aver kon la fotografia. Savemos ke mizmo oy en diya ay syertas restorasyones ande estan metyendo un almaryo kon kashones al lugar del almaryo del Ehal a Kodesh. Espero de ver restorasyones reushidas en muestra sivdad i en muestro payis.
Esta ekspozisyon va ser avyerta fin a el 16 Marso. I el 17 vamos a ir de muevo a esta sinagoga para una mueva ekspozisyon.
