Eliz Gatenyo
Shabat pasado Alain Finkielkraut, el filozofo famozo i pensador judio-franses, fue insultado sin kedar por personas antisemites, en Paris. El se topava en el kartier 14eme arrondisement de Paris ande se topavan las kazas editoriales i las imprimerias. Los atakantes kon jiles amariyos eran djente ke aviyan vinido de los banliyös del entorno i ke se enfiltraron aryentro de las manifestasyones de los “jiles amariyos” verdaderos.
Finkielkraut guadro su kalmo, no les respondyo ma los polises lo guadraron i lo alesharon de akel lugar. Sigun la gazeta “Le Parisien”, el no se va keshar por ke pensa ke estos atakantes no son los “jiles amariyos” verdaderos.
De otra parte, oy (Martes el 19 de Febrero) uvo una manifestasyon en Paris Place de la Republique i en munchas otras sivdades kontra el antisemitismo. Esta manifestasyon fue organisada por el partido sosyalisto i otros partidos ke se adjuntaron. El Partido de Marine Le Pen, ke es el partido de la derecha ekstrema, no fue envitado a esta manifestasyon. Ma eya de su parte deklaro ke eyos apoyan esta idea. El govierno tanbien deklaro su apoyo.
En la television de Fransia “Europe1” aviya komentarios sovre este evenimiento. Disheron ke lo ke se paso diya de Shabat era un akto ke desde 70 anyos no se teniya visto. Mizmo, ke no se teniya nunka visto. Por ke en el tiempo de los Nazistos estos aktos se aziyan de noche en lo areskuro i en anonim. Agora todo esto afito entre el diya, debasho del sol… todos vieron todo… de una parte vimos el aboresimyento i de la otra parte la inosensya. Todos los antisemites vistiyan estos jiles amariyos ma no kero dizir ke naturalmente todos los ke vistiyan jiles amariyos eran antisemitos.
Munchos fransezes dizen ke estas manifestasyones menasan no solo los judios, ma tambien la Fransia entera.
