Un milagro de Purim, en Yerushalayim en 1933. Esto es lo ke los arshivos istorikos de la Alianza Israelita Universal (AIU) en Israel nos estan revelando. Podesh ver estos dokumentos fasinantes sovre la Eskola de Sodros i Mudos de la Alianza en Yerushalayim.
Un milagro de Purim, en Yerushalayim en 1933.
En 1932 se avyo la eskola de los sodros i mudos de la AIU para las kriyaturas chikas i chikos, ke entre eyos munchos son deshados a la atansiyon de la sociedad djudia de Yerushalayim. Estos chikos son edukados i suanyados porke la Alianza vido en eyos una kapasita para progresar i kijo aparejar un avenir para eyos.
El 9 de Marso de 1933, la eskola de sodros i mudos envito las otoridades de Yerushalayim a asistir al festival de Purim en la eskola. Despues de su diskorso, el direktor Höxter invito las kriyaturas a prezentar un tablo inspirado de la “Kaperucita Kolorada” (Kırmızı Başlıklı Kız), i despues una ovrra de teatro sovre el tema de Purim i la reyna Ester.
La Sinyora Guitta Dizengoff era profesora en la eskola de sodros i mudos de la Alianza en Yerushalayim i fue la organizadora del evento. Para entender la sorpreza de la odiyensa invitada a esta prezantasyon teatral realizada por las kriyaturas sodros i mudos, la oyeremos kontar este evenimyento: “Muestros envitados se amuzaron muncho i kon muestros estudiantes, al ver a la chika madre vistir su ija. La parte mas seryoza, mas emportante i yeno de emosyones empeso kuando ampesimos oyer la madre avlar kon su ija, i la odyensya se enkanto de oyir palavras de los sodros i mudos ke ekspresaron byervos i dospues frazas enteras i dizir ke 4 mezes antes estos chikos estavan kaji abandonados i ke apenas sin un mirador.
Dospues de este evento, se aparejo un raporto ke inkluyo detalyos i fotos para deskrivir esta festividad de Purim, ke la Sinyora Dizengoff embiyo al sentro de l’AIU en Paris. I de estos mismos dokumentos de los arshivos istorikos de la Alianza en Israel mos ambezimos estos detalyos.
Las fotos reflektan este diya, amostrando los chikos aktores kon kostumes i kon seryo bivyendo sus roles.
Esto amostra la utilidad de los arshivos de la Alianza, ke permityeron a bivir de muevo estos momentos del pasado para entender mas mijor el ekstento de los lavoros edukativos i sosyal de esta institusyon durante los anyos.
Estos dokumentos salyeron en medyo durante el lavoro preparatoryo de la dijitalizasyon de los arshivos istorikos de la AIU relativos a Israel. Este proyekto fue posivle grasyas a los jenerozos fondos de SucDen, la Fundasyon Rothschild Hanadiv Europe en Londra i la Fundasyon para la Memoria del Olokosto.
Tomado del bulten del AIU
