Este diya de alhad en el Museo Djudio d’Estanbol teniyamos un konserto de musika klasika de un trio enkavesado por el Doktor Musa Albukrek. Serka de syen personas estavan en el Templo de Neve Şalom para este konserto. Estamos organizando estos konsertos para ke la djente vengan a vijitar el Museo. Oy en diya muestro primer buto es ke el Muzeo sea vijitado por mas muncha djente. I eskrivimos en los anunsyos ke el konserto es sin paras para los ke vijitan el muzeo. I kreo ke muncha djente no estan kontente de esto. Si vinyeron al punto dalkavo solo para el konserto no keren pagar. Diya de alhad estava djusto al lado de Roberto ke es responsavle para resivir los visitores al museo. I syertas personas no estavan achetando esto. Tomi un papel del museo i eskrivi sus nombres dizyendoles ke pueden vijitar el museo debaldes kuando keren. I este modo pagaron las paras mas kontentes. Agora dainda no semos una fondasyon muy poderosa de punto de vista “moneda”. Kuando vamos a ser, vos prometo ke vamos a organizar mas munchas aktividades kulturales i musikales ande muestros enteresados van a partisipar libremente.
Noche de Alhad kon mi mujer mos fuimos al konserto del famozo violonisto Ara Malikian. Un muzisyen orijinaryo de Lebanon, ke paso su vida en diferentes payises de la Evropa: en Alemanya, en la Inglatiera i en Espanya. Oy en diya esta morando en Espanya. Es un violonisto ke esta espedasando el enstrumento en kada kante. No se esta kedando repozado en la shena. Esta saltando, baylando kada momento. No solo el. Los syete otros miembros del grupo estan ajitados komo el. De ke vos esto kontando esto todo. Entre kada kante mos konto una konseja ke bivio en diferentes payises. En saliendo kon mi mujer mos demandimos si estas konsejas eran kavzos ke bivio o si mos konto bavajadas. La mas grande partida estavan siguros ke todo lo ke konto eran evenimyentos ke bivyo el mizmo. Vos va kontar solo una de estas konsejas. En Alemanya kuando no konosiya la lingua kon su enstrumento en su kuti se fue a un konserto de muzika klasika i en el antrakto una mujer le demando una kestyon. No entendyo i le disho “Si”. Era el solo byervo en Aleman ke saviya. I le izo konoser otras personas i respondyo “Si” a todo lo ke le demandaron. Despues uno le ekspliko lo ke se paso. Le demandaron si era Djudio, si konosiya las kantikas tradisyonalas de los Djudios, si puediya djugarlas i si puediya vinir a la boda de un muzisyen djudio ke aviya. A la fin kon su koraje su fue a la boda i durante kuatro anyos su echo era de djugar kantes tradisyonales djudias en las bodas de los Djudios.
De ke vos konti esto? Porke kada semana kon mi ijo estamos eskrivyendo un evenimyento para aklarar una dicha o un proverbo. I estamos kontando munchas kozas. I la mas grande de muestros lektores se estan kreyendo en lo ke estamos eskrivyendo. Mizmo me estan embiyando haber para demandar el hatir de la mosa de mi madre!
No se si lo ke konto Ara Malikian es djusto o no! Ma para aklarar una dicha de vez en kuando vos estamos kontando senaryos ke no bivimos.
