La semana pasada vos konti sovre un livro ke fue publikado. Ma komo aviya munchas kozas de kontar, el artikolo fue un poko largo i malorozamente mi segundo artikolo ke estamos azyendo esforsos kon mi ijo Eyal no fue publikado. Mizmo syertas personas ke meldan el Şalom fina el punto dalkavo demandaron “Deke no eskrivitesh esta semana?”. Esto tomando un grande plazer kuando me demandan kestyones asemejantes. Deke? Porke esto es el sinyo ke ay personas ke me estan meldando. Mizmo esto sintyendo sus reflo en mi piskueso kon las personas ke me demandan syertas kozas sovre lo ke esto eskrivyendo.
El 22 de este mez vamos a ver un filmo intitulado “The Final Hour”. Un filmo produsido por Çağlar Mallı i Selim Kenahlı. No se lo ke es, i no se deke estan avlando i kon ken avlaron ma vos puedo dizir ke no avlaron kon el prezidente del Sentro Sefaradi. Es un filmo ke esta enterojando las razones del perikolo de la disparisyon de la lingua Judeo-Espanyola. No es el primero filmo ande se esta avlando de este sujeto. Ma yo no esto de la mizma idea. En el empesijo de los anyos 80 se avlava de la mizma manera ma 40 anyos despues puedesh estar siguros ke la lingua Judeo-Espanyola esta mas adelantre ke kuarenta anyos antes. Los mansevos puedeser avlan mas manko esta lingua ma tyenen mas munchas posibilidades para ambezarsen. Solo ay serka de kinyentas personas / lo mas muncho mansevos ke estan en un grupo “Grupo de Judeo-Espanyol” moderado por Karen Şarhon, Emel Benbasat i Henri Çiprut i ke publikan en dos diferentes grupos de Whatsapp (en un grupo puede egzistir lo mas 250 personas) kada dia una fraza. Empesaron kon un biervo ma mezes despues empesaron a eskrivir syertas frazas. Si estash sigiendo este grupo esta reelmente muy enteresante. Kada semana una oja i una vez al mez dos ojas del Şalom esta publikado en Judeo-Espanyol. Es la kuantitad la mas ancha ke se esta publikando en esta lingua los kuarenta anyos dalkavo en muestro payis. I kale akodrar ke “El Amaneser” es publikado kada segunda semana del mez kon su trenta i dos ojas. Kale atorgar (itiraf etmek) ke todos los ke eskriven para el Amaneser no son turkos ke biven en Turkiya, ma por el Şalom es diferente i todos los autores son turkos.
Malorozamente no va tener la posibilidad de estar en la primera prezentasyon del filmo por ke va estar en Andirne para “el iftar”. No es posivle de estar aya i aki. Ya lo savesh puedeser ke kada anyo estamos dando un pranso de iftar delantre de la meshkita de Selimiye. I esto es apresiado por el puevlo d’Andirne i los dirijentes de esta sivdad. Espero ke el filmo va ser apresiado por el publiko. I si es reelmente enteresante vamos a azer todo modo de esforsos para pueder amostrar este filmo mizmo en el muzeo.
Vos va akodrar ke estamos azyendo esforsos para ke el Muzeo Djudio d’Estanbol sea vijitado mas por el puevlo kada diya i espesyalmente los dias de Alhad. I para esto estamos organizando konsertos, konferensias i mizmo filmos. Este alhad es la semana dalkavo para pueder ver la Ekspozisyon de las Megilas Ester. I a las 3 de la tadre tenemos la posibilidad de oyir el konserto del grupo “Lozan Mübadilleri Korosu”. I despues de midi todos los ke son enteresados pueden vinir al muzeo para demandar kestyones sovre el Djudaizmo i los Djudios turkos o no.
Es la sinyora Karel Valensi kon un grupo ke es kargada de esta aktividad. No vos esto avlando de los djudios, estamos envitando los ke no son djudios.
