Dizde ke muryo Miryam, se enkuvryo el pozo de agua ke iva kaminando kon el puevlo. Topandosen a ora el puevlo mankos de agua se rekojeron todos sovre Moshe, porke los kito del Ejipto i los yevo a este dizyerto ke no ay nada de bueno ni mizmo agua para bever. Moshe i Aaron ke ya se avian dezuzado de estas litigas, se deskorajaron muncho de esta mueva pelea, komo ke se fuyeron del puevlo i se entraron a el Mishkan.
En el Mishkan, se les aparesyo la onra del Todo Poderozo, i disho el Kriyador a Moshe ke rekojgan todo el puevlo i ke digan a la penya ke les amostra ai ke kitara agua, i ke bevan todo el puevlo, eyos i sus bestyas. Moshe tomo la vara sigun la enkomendo el Kriyador i rekojendo a todo el puevlo delantre la penya les disho Moshe kon ravya: Sintid, reveyadores, keresh ke de esta penya vos kitemos agua? Moshe harvo dos vezes kon su vara a la penya, i salyo agua, agua en abondansa i bevyeron todo el puevlo i sus bestyas.
El Kriyador ke ya savemos ke apunta kon los Buenos asta el ultimo grado, ma no topo djusto este konporto de Moshe i Aaron. Seya por lo ke se aravyaron del puevlo i los trataron kon palavras fuertes, sea por lo ke se fuyeron del puevlo i no tuvyeron konfiensa en el Kriyador ke tyene el poder de azer unos milagros delantre todo el puevlo por onde no pensan.
Sovre esto les dize a Moshe i a Aaron Akoen por este pekado ke kometyeron no van a ser meresyentes de traer a los djudyos a la tyerra prometida, i ke deven murir en este dizyerto.
El puevlo arivo a una sivdad nombrada Or. En este lugar les disho el Kriyador a Moshe i a Aaron syendo ke Aaron no va entrar a la tyerra prometida, kon esto ke se apronte para murir i espartirse de este mundo. Le dize a Moshe Rabenu ke tome a Aaron i a Elazar su ijo, i ke los suva a la montanya Or, i ayi ke aga deznudar a Aaron Akoen de sus vistidos de Koen Gadol, i ke se los aga vistir a Elazar su ijo, i Aaron ke se rekojga i se muera ayi. Moshe Rabenu izo el komando del Kriyador i suvyeron los tres a este monte delantre de todo el puevlo, i deznudo a Aaron de sus vistidos i se los vistyo a Elazar, i muryo Aaron Akohen. Los djudyos lo yoraron i lo endecharon 30 dias i teniya Aaron kuando muryo a 123 anyos.
