Me akodro ke sinko-sesh anyos antes, los Alemanes ke biven en Alanya i ke la mas grande partida son jubilados kijieron fraguar una iglesia. Ma no reusheron a realizar este proyekto. La mas grande partida eran personas ke no eran muy relijiosos ma kerian una iglesia. Es en estos diyas ke me ambezi ke ay mas de noventa anyos (noventa i sesh anyos oy en diya) ke los governos turkos no dyeron permisyon a la fragua de una iglesya. De ke? Reelmente no pude saver la repuesta a esta demanda.
Diya de Shabat avri la televizyon i vide ke el Prezidente de la Republika Turka, el Sinyor Erdoğan esta avlando en una seremoniya. Era la seremoniya de echar los fondamyentos de una iglesya Asireano en Yeşilköy. Oy en diya en Turkiya biven mas de diziocho mil Asireanos i malorozamente no tyenen una iglesia ke les apartiene. Emplean syertas iglesias de los Latinos Katolikos mizmo si la grande partida son Ortodokses. De ke no dar la permission para fraguar una iglesia para tanta djente.
Al lugar de esta iglesia anyos antes egzistiya una iglesya Katolika i pudyeron tomar la permision nesesarya para la fragua. I los Asireanos estavan muy kontentes en esta seremonia. Antes de eskrivir este artikolo demandi a siertas personas si reelmente era la primera fragua de una iglesia en la epoka de la republika Turka. Uno me avla de una fragua parsyal en Karaköy porke avian ancheado la kaleja kortando la iglesya. Otro me disho las iglesyas (kamaretas) ke formaron en los aeroportos. I alguna iglesya kon una sinagoga ke avrieron en Belek para amostrar la Pas en muestro pais - ma malorozamente estos dos lugares son leshos del sentro i es muy difisil para ir.
La semana pasada empeso kon dos fuegos en la sivdad de Mardin. La sivdad ande moraron anyos i anyos los Asireanos. I dainda ay buen karar ke biven en esta sivdad. Tyenen un Monasteryo ke es muy emportante para eyos. I malorozamente me ambezi despues ke estos dos fuegos tomaron lugar en los kampos del Monasteryo i en siertos kazales ande biven dainda los Asireanos. Estos dos fuegos eran el resultado de una negra intisyon para ke los Asireanos abandonen estas tyerras.
Reelmente dos evenimyentos kompletamente kontraryos.
Ma estava muy kontente de oyir i ver este evenimyento en la televizyon. Dos anyos despues van a eskapar la fragua de la Iglesia. I reelmente kero ir a la avyertura de esta iglesya (Yeşilköy Mor Efrem) para partajar sus alegriya.
