Kuando saldresh a la gerra kontra tus enimigos, el Kriyador los entregara en tu mano. Rabenu Bahye en su livro “Hovat elevavot” konta dizyendo: Un haham vido soldados ke estavan tornando de la gerra, borrachos de la viktorya ke ganaron, i glorefikandosen kon grandeza. El haham les dize: porke estash muy alegres i gustozos? La gerra ke ganatesh es una gerra chika i muy fasil. La gerra ke vash a enpesar agora es muy grande i difisil. Venser otras personas es muy fasil, ma la persona ke puede venserse a si mismo es el baragan.
De este chiko pasaje entendemos ke la perasha “Ki Tetse” no esta tratando solamente de la gerra ke gerreyamos kada ora i punta kon muestro apetite al malo i los sintimyentos non buenos. La gerra ke se aze kon los enimigos es por arrezyar el estado i la libertad. Kontra esto la gerra ke se aze kontra nuestros apetite, el malo es por nuestra buendad partikular es por la buendad de pueder afirmar las enkomendansas verso el Kriyador. El Kriyador nos prometyo dizyendo komo vos komportash kon mi i yo me vo konportar kon vozotros. Komo esto dicho en el verseto de la perasha kuando vas a salir a la peleya el Kriyador te dara a el enimigo en tu mano. Ma kon una kondisyon si tu puedes verser a tu apetite. Estonses vas a salir a la peleya, i vas a tornar a tu morada en pas.
La unyon de la nasyon es muy enportante para la egzistensya de el puevlo. Komo el peskado no puede bivir sin agua, el bivo no puede egzistir sin respirar. Ansi sin tener unyon no puede egzistir un puevlo. El puevlo deve de estar aunado komo un kuerpo i una alma.
Entonses prospera i adelanta. Entre la djente deve de reynar pas i verdad, amor i ermandad.
En kuatro perashiyot en la Tora, se trata el sujeto de la peleya. Prima, kuando vas a salir a la peleya i vas a ver kavayos i armas, i puevlo muncho no te espantes porke el Kriyador esta syempre kon ti, segundamente, devemos de guadrar nuestra alma en la gerra djunto, las almas de los enimigos i por esto dize en i Tora “vas a apreganar la pas”, treseramente, no solamente te vas a apiadar de las personas sino de los arvoles de fruto, porke es el mantenimyento de el ombre, no puedes danyar ningun arvol de fruta. Kuatro: deves de konportarte kon djustisya.
En estos diyas de piadades ke nos topamos en el mez de Elul miraremos i azeremos esforsos a venser a nuestros sintimyentos non buenos. Konoseremos nuestros defektos i los desharemos.
Le disheron los elevos a un sinyor haham nombrado R. Naftali: Sinyor ke nos de un konsejo bueno konseyamos preados, debasho de muestro apetite el malo. El Rabi les responde dizyendo: Yo esto siguro ke el apetite malo no va presigir a vosotros, todo tyempo ke vosotros no andas detras de vuestro apetite el malo.
De este dialogo puedemos entender ke todo esta dekolgado, en la veluntad de el ombre. Nozotros si echamos un paso derecho el Kriyador nos ayuda a kompletar i a azer lo bueno. Komo esta dicho: Vosotros avrime un burako del alguja, yos vos va avrir a vosotros puerta de palasyo, dize el Santo Bendicho el.
