Komo lo vash a meldar en el Amaneser la semana pasada tres diyas estava en Tel Aviv i otras sivdades de Israel. Durante estos diyas tuve la posibilidad de segir una konferensia sovre las reservas de gaz de Israel i de los otros paizes en esta rejyon. I estamos vyendo lo ke troko en los trenta anyos dalkavos…
No se pensava ke Israel puediya afrontar (karşılamak) el menester de su enerjia. Oy en diya ya se save ke tyene una rezerva de gaz para sinkuenta anyos. I estan pensando si deven de vender esto o tenerlo komo rezerva. Komo el payis los anyos dalkavo izo grandes atakes en la teknolojia vemos ke el revenido por persona es mas alto ke 40.000 dolares. Es una lokura. Es un montante serka el de la Inglatierra o mizmo de la Alemanya ke son los payizes los mas rikos de la Evropa. En komparando a la Turkiya ay una grande diferensya entre los dos payises. Kuando Israel topo el gaz el solo remedyo era de vender esta rikeza a la Turkiya o a la Evropa empleando un buri ke va pasar por la Turkiya. De una vanda las relasyones negativas entre los dos payizes, de la otra vanda el koste de una transportasyon ke va pasar por la Gresya enkorajo el payis mizmo a no vender su enerjia demaziyada. Fui muy kontente de oyer este todo para un payis fondado 71 anyos antes en una rejion yeno de problemes. Vemos ke oy en diya dainda se esta adelantando en la high tech i esto esta azyendo riko al payis. Las firmas las mas emportantes estan avryendo departamentos en Israel para lavorar mas produktivo en la Evropa.
Todo esto es una maraviya. Ma no para el turisto turko. Una nochada me fui al market ke se topava al lado del otel para merkar un paketiko de biskochos kon un bokal de agua; devo partajar kon vozotros; pagi 39 shekeles, mas de 60 liras turkas. Kreo ke ya lo merko esto a 6-7 liras en Estanbol. Es djusto ke el revenido por persona es kuatro vezes mas alta ma el presyo de la agua kon los biskochos son dyes vezes mas alto. Kreo ke es la mizma koza kon los presyos de los restoranes i de los taksis. Durante este viyaje la sola koza ke me ambezi ke oy en diya ay munchos paizes ande se vende el diesel i la benzina a un presyo mas alto ke en Turkiya. Un anyo i medyo antes meldavamos kada diya en la gazeta ke la Turkiya es el payis ande se vende la benzina al presyo el mas karo. Despues la Norvedjia reusho a pasarmos en el presyo del oil. Oy en diya tenemos kreo un presyo bastante barato en komparando a los otros payises. Avagar ke los diridjentes ke no lo sienten, si no vamos a pagar mas muncho en merkando el fuel.
Diya de alhad de esta semana me va ir a Paris para la seremoniya de los 40 anyos de Vidas Largas. Esta asosyasyon fondada kon los esforsos de Profesor Sephiha oy en diya esta dainda lavorando i realizando munchos proyektos. Espero ke los Sephardim de Fransia van a kontinuar a mantener muestra lingua i muestra kultura. Komo se topan en Fransia estudios sovre esta lingua i kultura en diferentes universidades, el futuro de muestra kultura deve de ser mas produktiva en este payis. Kale saver ke lo ke estamos azyendo en Turkiya es reelmente kon los esforsos de unas kuantas personas. No tenemos bastantes akademikos ke lavoran en este kampo. Ma vamos a kontinuar a produsir munchas kozas en este kampo ogurando anyos munchos i buenos a VIDAS LARGAS.
