Eskuchad los syelos las palavras ke esto avlando i oyid las dichas de mi boka. Ansi empesa la perasha de Aazinu, kon las palavras de Moshe Rabenu. Ansi Moshe Rabenu se adresa a los syelos ke el estava serka de los syelos, por razon ke se aserkaron los ultimos dias de su vida. Un poko mas el ya se iva aportar de este mundo materyel, i se iva ir a el mundo vinedero. Por esta kavza empeso i se adreso a los syelos. I despues se adreso a la tyerra. El tomo por testigos a los syelos i a la tyerra. Si el puevlo djudyo no va sintir las palavras de el Kriyador, no va andar en sus kaminos, los syelos i la tyerra van a dar testimonyos por sus non buena kondukta. I el eskopo ke Moshe Rabenu tomo por testigos para testimonyar la kondukta del puevlo djudyo a los syelos i a la tyerra, porke son firme todo tyempo ke el mundo egziste. En kavza ke el puevlo djudyo no va estar korekto kon el Kriyador i kon su ley santa, estonses los syelos no van a dar las luvyas i las tyerras no van a dar sus produktos komo lo meldamos en la Shema. No va aver luvyas i la tyerra no va dar produktos. Nuestros savyos dan tambien otra razon sovre este sujeto. Kijo dizir Moshe Rabenu, mirad a los syelos i a la tyerra si eyos salen del orden del patron de el mundo. Los syelos syempre dan las luvyas i la tyerra sus produktos i no trokan de sus naturas.
El mundo se sostyene por el merito de la ley i de el servisyo a el Kriyador i sovre la bienfezensya. Si somos korrektos en estos pilares sakros, egziste en el mundo paz i trankilidad. Bivimos sin espanto vida repozada. La luz de los syelos es la Tora. Por el merito de la Tora, egziste en el mundo repozo. David Ameleh en el livro de Teilim dize: El Kriyador, nuestro sinyor, ke fuerte es tu nombre sovre el mundo. Tu das la ermozura a los syelos. Ansi da de tu ermozura a la djente. I da de tu luz a los ambezantes de tu ley santa. Por la boka de los chikitos i mamantes, enforteses los simyentos de el mundo. David Ameleh kijo dizir, la Tora ke se ambezan los chikos i se syente de sus bokas, se sostyene el mundo. El Kriyador ke mos da la fuersa i la enerjiya de azer teshuva kumplida, i este Shabat ke es Shabat Teshuva, el Kriyador ke nos membre a nosotros i nos de vidas largas kon salud buena.
Gemar Hatima Tova.
