En Mayo estava invitado a Seattle por el Ministeryo de echos estranjeros de la Espanya para un reunion ke organizan kada dos anyos: “Erensya”. Ya savia esta sivdad i sus Djudios Sefaradis ma no tanto. Despues de esta vijita, me ambezi ke Seattle es una de las mas importantes Komunidades Sefardis de los Estados Unidos. La mas grande partida de estos sefaradis son los inyetos i bisinyetos de los ke vinyeron de la Isla de Marmara, de Rodosto (Tekirdağ) i de la Isla de Rodes. I reelmente es un a komunidad Sefaradi muy organisada i muy poderosa. Lavoro en un a asosyasyon ke se yama “Asosyasyon de konservar la Erensya Kultural”. El buto es de konservar todos los sitos istorikos sin posesor (sahipsiz) i azemos syertos projektos para topar estos sitios i monumentos en todas las partes de la Turkiya. Estos mezes dalkavo resivimos un fondo para egzaminar los sitios i las kazas antiguas de las islas de Marmara i la arkitektura en estas islas. I estan terminando este projekto. Kuando mos kontaron lo ke estan azyendo en una reunyon en la Isla de Marmara les dishe ke kero partisipar a la vijita dalkavo ke van a realizar en esta isla. I myerkoles pasado kon la araba tomi estos dos amigos i mos fuimos a Rodosto i de aya kon feribot a la Isla de Marmara. Vimos en primero las minas de marmol ke es muy renomado en esta isla. Es su mas grande rikeza. I ay vapores evropeos ke estan asperando estos blokos de marmol.
En la entrada del Sentro de Marmara se topa un grande edifisyo ke apartiene a la institusion de Karne i de Leche (Et ve Süt Kurumu) ande fraguaron un depo frigorifiko djusto ande era el Simiteryo Djudyo. I unas kuantas pyedras de las tombas estan en el kazal de Çınarlı ande ay un museo personal. I estan azyendo esforsos para la fundasyon de un museo en la vyeja Eskola Grega de las Ijas. Espero ke lo van a realisar. Kon estos amigos entre tantos otros edifisyos vimos el lugar ande se topava el Kal de la Isla de Marmara. Pudimos ver tres magazenes ke aparteniyan a tres diferentes djudios. I komo eran fraguados kon una alta kualidad no fueron danyados del rash de 1935. Uno fue merkado por una mujer i su marido ke vinieron de Şişli, Estanbol para un magazen ande azen produksyon de objektos de seramika. Mos disheron ke era el magazen de merseria (tuhafiye) del sinyor Kalvo. No se si es el mizmo Kalvo ma la kaza ke fue restorada i kreo ke es la kaza dalkavo ke fue “Una kaza Djudia” es la kaza de Kalvo. No se a ken aparteniya esta Sinagoga ke no se toko dainda i el simeteryo Djudyo ke fue derrokado por la institusion de Karne i de Leche. Ya savemos ke dyes o kinze anyos antes el prezidente de la munisipalidad envito tres profesores de la Universidad Teknika d’Estanbol para azer syertas bushkidades en la Sinagoga de la Isla de Marmara.
Mos kontaron munchas kozas sovre los miembros de esta Komunidad. Ya savemos ke el sinyor Samuel Abrevaya ke tomo despues la alkunya de Marmaralı era un ombre ke nasyo en esta isla i fue nomado i elijido deputado.
Para terminar, estos amigos travaron fotografias para mostar la arkitektura sivil de esta epoka. No se si puedemos azer un livriko para mostrar la vida Djudia en la Isla de Marmara. Vamos a ver. Kreo ke muestos amigos de Seattle mos deven de ayudar. En la Sinagoga de Yambol en Balat se topa una eskriturya ke se topava en el kal de la Isla de Marmara. Mizmo en una kaza ke aparteniya al sinyor Leon Brudo ke teniya un magazen de merseriya i una kaza en el primer etaj estava eskrito, “Furtuna Marmara 1935”. I esta kaza era merkada por un Marmarali ke teniya una mavna i aziya el transporto ente la Isla de Marmara i Estanbol. Es dainda posivle de ver estos biervos ensima de esta kaza en Balat.
