En los primeros diyas de este anyo, antes ke empesen las inyeves en Estambol, estamos lavorando en muestro echo i en las aktividades sosyales para pueder reushir en las responsabilidades ke tomimos. Las aktividades en el Museo Djudio d’Estanbol es uno de los mas emportantes doveres ke mos enkargimos.
El Sentro Sefaradi i el DIDL (Diya Internasyonal del Ladino) es un otro dover ke devemos de realisar el 16 Febrero 2020. Malorozamente el mismo diya tengo un otro echo muy importante ma no tuve el koraje de dizir al uno komo al otro ke tengo otro echo. Vamos a ver komo lo vamos a realisar. Bivir i ver.
Es los 3 o 4 diyas dalkavo estamos mas aktivos en este kampo. Ya se ke Forti Barokas kon sus artistas i artistos mos esta aparejando un muzikal. İzzet Bana kon las Estreyikas d’Estanbol esta pronto para darmos un konsyerto. Vamos a realizar i este anyo muestro DIDL en el auditorium de muestra eskola: en el Amram Auditoryum. Kada anyo estamos azyendo esforsos para prezentar una aktivitad mas reushida. El anyo pasado todos los ke partisiparon alavaron i alavaron todas las aktivitades.
Ya savesh ke kada anyo tenemos un avlador o una avladera estranjero/ra. Este anyo tenemos una Parisiana ma diya de alhad telefoni para demander a Karen kuando va vinir Fulana i me disho ke yo estava responsavle de esta invitasyon. No se si me olvidi, ma espero ke amanyana va tener la buena repuesta. Si no devemos de bushkar una otra persona.
Es este diya estamos preparando komidas sefaradis i kasher komo kada anyo i kreo ke vash a estar kontentes del pranso ofresido. No vamos a ver una grande diferensya ma la komida va ser savroza. Una sorpresa va ser realizada durante la komida. Komo kada anyo Süzet, Anna i Şeli estan preparando una mueva parodiya.
Karen Şarhon, Forti Barokas, Ferit Kohen, İzzet Bana i un alay de miembros de muestra asosyasyon estan lavorando para reushir este diya. En una o dos semanas vamos a deklarar komo vash a pueder reservar vuestros fotolyos para ser achetados.
Devemos de lavorar dainda muncho para ke este diya sea reushido.
