Sigun konta en la perasha de la semana pasada en el entervalo un anyo, mando el Dyo dyez yagas, una mas fuerte ke otro a el Ejipto. En primero se trokaron las aguas en sangre, i muryeron los peshkados del riyo. Despues se muchiguaron en el riyo las ranas, ke salyeron de las aguas i kavzaron munchos danyos en la tyerra. I se konkriyo piyojos muy danyozo i se ve unos animales krueles. I uvo una mortaldad en las kuatropeas ke izo muncho danyo. Una fuerte sarna le vino a todos los ejipsyanos asta no pueder suportar. I uvo un buen pedrisko ke danyo todos los frutos del kanpo.
I en la perasha “Bo” de esta senama meldamos la kontinuasyon de las yagas ke son la langosta ke baryo todo lo sembrado. Despues les mando el Dyo una fuerte i espesa eskuridad ke turo tres diyas i tres noches de una manera ke los izo kevrantar muncho, syendo no se puediyan meneyar kada uno de lugar. Todos estos males fue suportando el kruel Paro, en de estar en su kapricho i no mandar a los djudyos de su tyerra.
Kuando se apezgava la fortaleza de la yaga sovre el i su puevlo, ya paresiya ke iva ablandar su korason i ya prometia de dar la libertad a los djudyos. Apenas kalmava la yaga i teniya un poko repozo, se enduresiya su korason. De esta manera suporto Paro i todo su puevlo estas mueve yagas myentres ke todos los djudyos, estando mismo mesklados kon los ejipsyanos no teniyan ningun mal.
La dyezena yaga (makat behorot) no pudo suportar asta el kavo, despues de sufriyir bastante ke todos los ijos mayores (behorot) de los ejipsyanos, de chiko asta grande, fin el ijo de Paro, muryeron todos en duna en la medya noche i fue forsado Paro de parte su puevlo yamar en akel momento a Moshe i a Aaron i rogarles ke salyeran eyos i todos los djudyos del Ejipto, i ke rogaran por su vida.
En la medya noche del 15 Nisan de este anyo, mando a dizir a todo el puevlo djudyo ke se topavan en la tyerra de Goshen ke eyos eran liberos i ke puediyan salir de su pais. Los Djudyos ke ya estavan prontos esperando esta ora; se rekojeron todos kon prisa en Ramses. A la manyana en el 15 Nisan salyeron todos los djudyos del Ejipto kon grande koraje i alegriya despues aver estado en el ejipto 210 anyos.
La suma del puevlo ke salyeron del ejipto era 600 mil almas ombres de 20 anyos para ariva, en desparte de mansevos manko de 20 anyos i de mujeres i kreaturas.
Los ejipsyanos konosensya a los kavos la grande endjustisya ke kometyeron kon los djudyos, i tambien ke vyeron ke ay Dyo en los syelos, ke paga a kada uno sigun sus echas, kijeron afalagarsen un poko kon eyos, i fueron regalandoles muncha plata i oro i pyedras presyozas i munchas kozas valutozas, i les aziyan demandar todo lo ke teniyan menester. Ansi salyeron los djudyos de Mistrayim kon muncha rikeza sigun se lo prometyo el Todo Poderozo a Avraam kuando le aviso lo ke teniya. Ke arivar a sus ijos, komo esta eskrito en el livro Bereshit kapitolo 15, “I disho a Avraam, saver sepas ke tu semen sera peligrino en tyerra ke no es suya, i los aran sirvir, i los afriyiran. I tambien a la djente ke los izyeron sirvir djuzgare yo, i despues de esto saldran kon ganansya grande.
