Kon la dechizyon ke fue dada en el anyo 2005, las Nasyones Unidas desidaron de komemorar el 27 del mez de Enero, el Oloskosto. El 27 Enero 1945 es la data ke el Kampo de Muerte de Aushwitz-Birkenau fue liberado por las armadas de los Aliados. I es reelmente un diya muy emportante para los Djudios del mundo entero. Es muy emportante porke los Djudios no keren mas bivir un evenimyento asemejante. El Masakro de los Nazis ande mas de sesh miliones de Djudios fueron matados es el mas grande masakro de la istoria. Oy en diya, los Djudios kon el Estado Djudio son siguros ke no van a bivir un evenimyento asemejante. En este diya los governos de los payizes ke afirmaron este akordo deven de edukar los profesores de las eskolas para ke ensenyen a los elevos este sujeto: La segunda gerra Mondial i las desgrasyas ke bivyo la umanidad kon los Nazis. No se si reelmente estan azyendo este lavoro. Malorozamente en muestro payis, en las lisyones de istoria, el sujeto de la Segunda Gerra Mondial se trata a la fin de la dodjena klasa, i komo todos los ke estan eskapando el lise estan lavorando para pueder entrar a la Universitad, el sujeto no solo del Oloskosto, mizmo de la Segunda Gerra Mondial no se trata. Es una verguensa. Kuando era prezidente de la Komunidad, izimos munchos esforsos para ke acheten de meter en el program de las lisyones de Istoria el Oloskosto ma devo de akseptar ke no reushimos.
Un mez antes, muestro amigo Metin Delevi disho ke devemos de organizar una ekspozisyon sovre el Oloskosto en el Museo Djudio de Estanbol. Propozo la ekspozisyon de fotografias de Alberto Modiano ke fueron realizades en Auchwitz-Birkenau, Treblinka, i Sobibor en 2011. El partisipo al “March of the living”. I tomo fotografias. Malorozamente kuando realisaron la primera vez esta ekspozisyon, publikaron fotografias muy muy chikas. I reelmente kedimos en una negra situasion mizmo si imprimimos sesh o syete deyas en una dimension mas grande. Una otra vez vamos a ser mas atentivos, porke un muzeo no tyene el derecho de azer ekspozisyones ke no son perfektas.
Munchas grasyas a Alberto Modiano por su lavoro. Diya de djueves serka de syen personas asistyeron a esta seremoniya de avyertura. Despues ke avli unos kuantos biervos, Alberto dyo syertas eksplikasyones sovre su lavoro. I despues tuvimos la posibilidad de segir un rezumen del filmo ke fue realizado por el Ministerio de los Echos Estranjeros de Turkiya kon la embashada de la Turkiya en la Afrika del Sud (Pretoria). La sinyora Lina Amato esta kontando komo el Konsul Turko de Rhodes, el Sinyor Selahattin Ülkümen salvo la vida de 45 Djudios ke tenian raises turkas mizmo si todos no tenian pasaportos Turkos. Malorozamente el Konsul Ülkümen pedrio su mujer, ke estava prenyada, despues del nasimyento de su ijo, Mehmet Ülkümen, despues ke un avion Aleman bombalado su kasa i su ofisio.
La ekspozisyon se puede vijitar fin a el 14 de Febrero 2020.
