En la perasha de Beshalah meldamos la salidura de Misrayim. Los grandes milagros ke izo el Todo Poderozo a las djudyos. El Todo Poderozo kito a el puevlo djudyo de esklavaje a libertad de eskuridad a luz grande. En la salidura de Ayifto, Moshe Rabenu no se olvida la palavra de Yosef Atsadik ke disho a sus ermanos: Kuando vos va rihmir el Kriyador i vos va yevar a la tyerra prometida no vos olvidesh de yevarme a mi kon vozotros. De fakto, ke meldamos en la perasha ,Vayikah Moshe et atmot Yosef… I tomo Moshe los guesos de Yosef, por kavza ke les dyo djura a sus ermanos. En el Talmud meldamos: sigun lo bueno ke azemos en este mundo kon su demazia mo lo paga el Kriyador de bueno. Moshe Rabenu se okupo de tomar los guesos de Yosef Atsadik, el Kriyador de bueno. Moshe Rabenu se okupo de tomar los guesos de Yosef Atsadik, el Kriyador el mismo lo entero a Moshe Rabenu komo lo meldamos en la perasha de vezot aberaha. “Vayikbar oto bagay”. En el livro de Yeoshua meldamos ansi. I los guesos de Yosef ke los kitaron de ayifto los enteraron en Sehem. Sovre esto dize el Talmud de nombrado de Rabi Hama bar Hanina. Una persona ken enpesa a azer una mitsva, i la kompleta otra persona el ke la kompleto se konta komo el la izyera. Ma aki no era posivle ke Moshe Rabenu la puediya kompletar la mitsva de enterrar los guesos de Yosef Atsadik por kavza ke Moshe Rabenu no iva entrar a la tyerra prometida. Dunke la paga buena del Kriyador ke le dyo a Moshe Rabenu fue de enterrarlo el mismo a Moshe Rabenu. Kuando salyo el puevlo de ayifto, i estavan pasando la mar ruvya, el puevlo kayeron a un grande dezespero. Ken diziya nos echaremos a la mar, ken diziya tornaremos, i ken diziya esklamaremos a el Kriyador. Moshe Rabenu raporto el komando del Kriyador i les disho a el puevlo, “El Kriyador va azer la gerra por vozos. Vozos espera la salvasyon ke vos va trae el Todo Poderozo”.
