Kada dos semanas, noche de martes tenemos una reunyon en el Museo Djudio i devemos de topar muevas ideas paraa ke muestro museo sea mas i mas aktivo. Es la semana pasada, avlando sovre las ekspozisyones ke dimos karar de organisar tres muevas ekspozisyones. La primera sovre las Hanukiyas. Ya savemos ke setenta / ochenta anyos antes los Djudios Otomanos estavan produsyendo hanukiyas de teneke. Eran proves i la endustriya no estava tanto a delantre. I vemos mizmo en muestro museo ke tenemos 3 Hanukiyas de teneke; i en siertas vemos motifes de minares de meshkita. I esto mos amostra la influensa de la ley musulmana o de las tradisyones turkas. Me akodro ke el Konsul de Israel en Estanbol, el sinyor Eli Shaket teniya en su kaza una koleksyon de Hanukias antiguas. Vos rogo de darmos haber para darmos verso la fin del anyo antes la fiesta de Hanuka vuestra Hanukiya. Preferamos ke sea del tyempo del Imperio Otomano. Puedeser Hanukiyas antiguas de todas las partes del mundo o mizmo Hanukiyas muevas ke fueron realisadas por artistos estos anyos dalkavo. Kreo ke vamos a reushir komo la Ekspozisyon de las Megilat Ester. Estamos siguros de vuestro apoyo para pueder realisar esta ekspozisyon. Ya puedesh telefonar o embiyar un e-mail al museo telefonando al numero +90 212 2926333.
La segunda ekspozisyon va ser sovre las Halilas. Ya savemos ke munchos Djudios en el mundo emplean una Halila para saver las fiestas Djudias i los meldados de los ke pyedreron. Mizmo tyenen de menester para saver la data de las Bar Mitsvas i de las Bat Mitsvas de sus ijos i ijas. En muestra sivdad es el Gran Rabinato ke emprima kada anyo una Halila ke es distibuida a todos los djudios ke pagan sus Kizbas. Ya savemos ke un amigo tyene una ancha koleksyon de Halilas. Ma puedemos topar munchas otras, no solo de Turkiya ma mizmo de otros payises. Ya savemos ke el Sinyor İzidor Barouh imprimio una Halila anyos i anyos. Despues ke lo piedrimos, es su ijo Yakup Barouh ke kontinua a imprimir esta halila. Emel Benbasat fue nomada Kurator de esta ekspozisyon i la puedesh kontaktar para ayudarmos. Emel Benbasat: [email protected] i su telefon es +90 535 3500778.
La tresera ekspozisyon va ser la Ekspozisyon de las Agadas de Pesah. Vide en syertas ekspozisyones (una organizada por el Sinyor Yusuf Altıntaş) agadas kon letras ebreas; ma meldando era en turko. Disheron ke era una Agada de Pesah realizada en Azarbeydjan kreo. En muestra reunyon, Nisya mos disho ke en su famiya tyenen una agada en letras gregas, ma kuando lo meldash es la Agada ke savesh. Vemos ke puedemos topar diferentes agadas. Ya savemos ke en el Imperio Otomano i en Turkiya munchas Agadas fueron publikadas. Esta ekspozisyon va ser realisada en el mes de Avril del anyo 2021. Pasensya. Para esta ekspozisyon penso ke devemos de lavorar kon todos los museos Djudios de la Evropa para tener una koleksyon reelmente ancha. Para esta ekspozisyon si tenesh siertas propozisyones puedesh telefonar al museo.
