Yitro, esfuegro de Moshe Rabenu, tuvyendo avizo de todo lo ke paso dizde ke salyo Yisrael del Ejipto, i todos los miraglos ke izo el Kriyador a los djudyos por mano de Moshe, tomo a Tsipora su ija, mujer de Moshe i sus dos ijos Gerson i Eliezer, i se fue para el dizyerto al monte de Horev por verlo a Moshe i alegrarsen kon el i saver todos los pasajes.
Arivando al monte de Horev, mando avizarale a Moshe su vinida, tuvyendo Moshe avizo de la vinida de su suegro, salyo de Refidim a su enkontro el i todos los grandes personajes de Israel. Lo resivyo kon grande respekto. Le izo las onores menesterozos i le konto todos los pasajes dizde el diya ke se espartyo de el fin este diya.
Yitro se alegro muncho de sintir todo esto i bendicho a el Kriyador en rekonosyendolo por sinyor de todo el mundo. Resivyo sovre si, de kerer en el solamente i guadrar sus enkomendansas i kedo en el dizyerto kon Moshe Rabenu.
De todas las gloryas i milagros ke vido el puevlo de Israel dizde ke enpeso a ser amado del Dyo, de mas alta i enshalshada glorya fue la resividura de la ley santa en el monte de Sinay. La kuala es un pasaje muy seryozo i muy enportante en la estorya del puevlo djudyo.
Despues de un mez i medyo ke salyeron Israel del Ejipto, el primo diya del mez de sivan, partyeron de Refidim i arivaron a el dizyerto de Sivan. I pozaron enfrente del monte de Sinay. En este lugar deklara el Poderozo al publiko por boka de Moshe Rabenu ke El (el Kriyador) eskojo este puevlo. “Vozotros vitesh muy byen”, disho el Kriyador “lo ke ize por vozotros a los ejipsyanos, i komo vos trushe asta aki, kon muncha siguridad komo sovre alas de agilas, i agora si vozotros keresh ovedeser mis ordenas i konservar mi firmamyento kon vozotros, de ser mi puevlo fidel, vozotros seresh muy keridos ma a kondisyon ke devesh de ser una nasyon de Koanim sirvidores del Dyo i un puevlo santo. Sintyendo estas palavras el puevlo, de boka de Moshe Rabenu, respondyeron kon el mas grande antusyazmo, “todo lo ke nos enkomenda el Kriyador vamos a ovedeser”.
Moshe Rabenu aze saver al puevlo la veluntad del Kriyador ke kere apareser su onra delantre de todo el puevlo en el monte de Sinay i darles su ley de su boka i ke es menester ke se santifiken.
El puevlo se syenten muy venturozos de este favor del Kriyador. Se lavan. Amanesyendo el diya de 6 sivan se enpeso a sintir unas bozes entremerivles de truelos i rilampagos i una boz de shofar muy temeroza. Una nuve kuvriya el monte i todo el puevlo se estremesyeron.
Despues de esto Moshe Rabenu los izo rangos a los pyes de el monte. Estonses oyo todo el puevlo una boz muy temeroza afuera de la natura ke se sintiya de la punta del monte ke enkomendava a el puevlo de Israel los dyes mandamyentos Aseret adiberot los kualas son las bozes de nuestra santa relijyon.
