“Les Magasins Tati”
Todo empeso en 1948, en el distrikto de Barbes, Paris, kon un sellier, Jules Ouaki de 28 anyos vinido de Tunisia. Dizian ke en el empesijo tenia un paraguas donde metia sus merkansias. El era muy buen vendedor i dizia a todos del redededor ke un dia el va ser el patron de este bulvar Barbes. Kuando izo bastante kapital se merko el primer magazen de 50m2. Mas tadre, kon el ayudo de una mujer misterioza, el merko un otel en Barbes ke lo transformo en “souk” para vender sus stokes a un presio muy barato. El avia komandado la ensenya Tita, el nombre de su madre, para su muevo magazin. Ma este nombre ya estava tomado por una komersante serka de el i lo amenaso de azer un proseso. Jules Ouaki para no tener problemas, troko las letras ke estavan prontas i en lugar de Tita lo izo Tati. Su slogan era “Tati, el presio el mas barato”. Verdaderamente, los presios de Tati eran muy konvenables a los budjetos de la djente de despues la gerra. El dizia a todos “yo va vender kalsados komo venden patatas.”
Tati fue un sukseso immediato i Jules Ouaki empeso a merkar todos los oteles de pasaje de Barbes i asi metio fin a la prostitusion del distrikto. La superficia de sus muevos magazenes eran de 2.800m2. Desde el anyo 1970 asta el anyo 1995, avia kada dia kola delantre sus magazenes. En el anyo 1987, el magazen resivio mas de 35 miliones de vijitadores, mas muncho ke la torre Eiffel. La stratejia de Tati se estava ensenyando en las universitas.
Malorozamente, este ombre kon vizion i perseverensia, perdio la vida en 1982 a la edad de 62 anyos deshando un imperio a una famiya kon munchos pletos. Tenia 5 kreaturas. El ijo grande se murio en un aksidente. La mujer de Jules Ouaki, Eleonora desidio de meter su ijo Fabien, el mas mansevo, a la direksyon de Tati. Estavan aviendo magazenes en todas las partes de Evropa, i mismo en la 5th Avenue de NYC. Ma el revenido se estava aminguando i las devdas engrandesiendo. En 2004, Tati se vendio al grupo Eram i despues, en 2017 al grupo GPG kon 109 magazines i 1428 empleyados. Kon los evenimientos de “Gillets Jaunes” i la kriza del “Covid-19”, entre oktobre 2019 i mayo 2020 la vendidad abasho de 60%. Antes de esta kriza la konkurensya de los magazenes H&M i Zara ya estava bastante difisil. La globalizasion i el orden de kozas baratas kon e-mail, esta trokando nuestra manera de bivir. Estamos en un siglo donde el trokamiento es tan subito, ke ya no se puede alkansar. Asi se terminan las aventuras de Jules Ouaki.
