İ aras un Kandelaryo de oro fino. Batido se ara el Kandelaryo. Su baza, sus brasos, sus vazos, sus botones i sus floresseran de si mezmo (Şem. 25/31). Ke es la sinyifikasion i el senbol de este Kandelaryo ke su rijo fue ordenado al Senor de Moşe Rabenu? La peraşa de esta semana non poza ningun motivo ni esplikasion sovre los objetes ke kontiene el tabernaklo, el santuvaryo portativo del dizyerto.Eya kontiene solamente el komando de fraguar una kaza a nombre de Dio, i pozar en eya los objetos relijozos sigun lo remarkamos en los versetos sigientes: İ me aran por mi santuvaryo, i morare entre eyos, sigun lo ke yo mostro, i la semejansa del tabernaklo, i a la semejansa de todos sus atkuendos ansi lo areş (Şem. 25/8-9). Los biervos por mi, lo esplikan nuestros savios, ke la fragua del tabernaklo deve ser, a la honor de Dio. El buto de fraguar un santuvaryo de mano del hombre, deve ser un çiko egzemplo de la kreasion del mundo de parte de Dio en sej dias. Afin ke esta kaza puedra ser la rezidensia de Dio en la tierra. Esta sinyifikasion es paralel a los versetos de la Tora en la kreasion del mundo, i en la fragua del tabernaklo. En la fragua del mundo el verseto dize ansi: İ se Akavo los siellos i la tierra i todos sus fonsado (Ber. 2/9). İ se akavo todo el servisio del tabernaklo. Ansi Akavo Moşe la Ovra (Şem. 40/33). İ vido el Dio todo lo ke iva eço, ke era muy bueno (Ber. 9/31).
İ vido Moşe toda la ovra ke avian eço, komo Dio avia enkomendado, ansi lo avian eço. İ Moşe los bendişo (Şem. 39/43).
Ansi los versetos ke Kontan la kreasion del mundo, asemejan munço kon los versetos de la fragua del tabernaklo. Esta semejansa nos endika ke la ovra del umano koresponde a la ovra divina. El puevlo de Yisrael kon su ovra krio un santuvario a la honor de Dio kriador del mundo. Esta esplikasion global de nuestros savios non entra en detalyos, afin de aklararmos la sinyifikasion i el senbol de los atkuendos ke kontiene el tabernaklo. El ilustre savio Arambam Konosido tanbien komo maymonides, nos akonseja de non buşkar senboles kon sinyifikesiones kuryozas i filozofikas, sino de kontentarmos kon butos muy semples ansi: El kandelaryo de oro puro i fino era semplamente por darle a la kaza de Dio un respekto i ermozura. Siendo una kaza ke se kon una luz grandisima, deşa una enportante enpresion en la alma del vijitador.
Ma munços otros komentaryos non estan dakordo kon el senor de maymonides. Eyos ensisten ke por siguro el tabernaklo i sus atkuendos deven tener en desparte de sus ermozuras fizikas, unos sekretos i senboles muy santos i spiritueles. Los kualos serian dinyos de toparsen en la kaza de Dio. En todo kavzo a la unimidad de bozes akseptan todos, ke la fragua del tabernaklo fue la ovra la mas grande del puevlo de Yisrael, en honor del altesimo Dio, kriador de los sipllos i la tierra.
