I sera, kuando vineres a la tyera ke el kriyador te dyo por eredarla, i la eredareş tomaras de los primeras frutas i pozaras en un sestiko. I andaros a el luguar ke el kriyador tu Dyo eskojera. Vendras a el Koen i diras: atorgo oy a el Kriyador ke yo entri en la tyera ke el Kriyador curo a nuestros padres ke nos aviya de dar. El Koen tomara el sestiko de tu mano lo pozara delantre de la ara (Mizbeah) de el Kriyador. İ responderas i diras delantre de el Kriyador. Kon poka cente Yaakov Avinu desendyo a ayifto, se izo ayi cente grande fuerte i munça, Los ejipsyanos nos maltrataron i nos afriyeron i metyeron sovre nosotros servisyo duro. İ esklamimos a el Kriyador Dyos de muestros padres. İ oyo El Kriyador a muestra boz i vido nuestra afriyisyon i nuestra lazerya. İ nos kito El todo poderozo de ayifto kon mano fuerte i braso tendido i kon espanto grande i kon sinyales i maraviyozas. İ nos truşo a este luguar i nos dyo esta tyera. Tyera manan leçe i myel. İ agora yo truşe las primeriyas de las frutos de la tyera ke me dates. A mi kriyador! İ lo deşaras delantre del Kriyador i tu enkorvaros delantre del todo poderozo i te alegraras kontado el byen ke el santo bendiço te dyo a ti i a tu kaza tu i el Levi, i el peligrino ke mora kon ti.
Kualo es la enportansa de la Mitsva de Bikurim de yevar los primeros frutos a el Bet-Amikdaş onde el Koen?
Tener la fey, la kreyensa ke todo poderozo kriyo el mundo. El mundo esta dirijido kon una fuersa muy grande i alta ke es la fuersa de el todo poderozo. Las eças ke son eças mezo las personas tanbien son dirijidas de parte del todo poderozo no puedemos dizir kon mi fuersa parvine a azer tala ovra. Sino ay el ayudo de Dyos afilu una ojika del arvole no aze su movimyento. Por esto devemos dar loores a el Kriyador por kada respirasyon i respirasyon ke respiramos. En kada momento el nos esta dando la fuersa de estar enpyes i bivir. Nuestra vida esta dekolgada a su orden. Dunke en yevando los primeros frutos a el luguar ke eskojo el Kriyador ke es el Bet-Amikdaş i denusyar a el Koen el pasado nuestra i dar los frutos en el Bet-Amikdaş a el Koen traye a el ombre a ser umilde i no ser orgolyozo enfrente su rikeza i su azyenda. Tambien la persona deve ser rekonosyente. Ke todo el bien ke tyene es una dadiva del Şem Yitbarah. Avraam Avinu planto un arvol en Beer Şeva ai resiviya a la cente i les dava a komer i a bever i los kontava la grandeza i la altura del Kriyador. Kuando lo rengrasyavan por todo lo bueno ke les dyo. Yo no vos di nada sino del todo poderozo komites i bevites a el rengrasya les diziya. Kuando el Todo poderozo ve las loores ke le damos kon todo muestro korason, el su apiada de nosotros i pija su bendisyones sovre nosotros.
