VEATA TEDABER ET KOL HAHME LEV AŞER MİNETİV RUAH HOHMA.
İ tu avlaras a todos los savyos de Korason, los Kualos yo inçi de esprito de savidurias.
La expresyon HAHAM LEV - “savyos de Korason” la meldamos por primera vez en le peraşa de TETSAVE i la remarkamos en el sujeto de la fragua del mişkan en las peraşiyat de “Ki tisa i vayakel”. Ke kere dizir savyos de Korason?
Ken tyene el merito de enkoronarse kon este titolo? La repuesta de estas kestiones lo puedemos topar en un verseto de la peraşa: UVLEV KOL HAHAM LEV NATATİ HOHMA. En el meoyo de todo savyo de Korason pozi saviduriya. La persona deve de aprontarse por komprar sensya. Estonses el Kriyador da de su sensya a tola persona. Ansi se deve de aperejarse la persona por komprar la sensya, la buena veluntad de enbezar. Komo lo vemos en Şelomo Ameleh komo es diço por el V.A. natan hohma lişlomo: El Kriyador le dyo sensya a Şelomo en Givon se aparesyo el todo poderozo a Şelomo el rey. Le demanda dizyendo kualo enveluntas demi? El responde dizyendo, sinyor del mundo yo rogo de ti ke me dez un korason de pueder enbezar la sensya, i pueder apartar la buena de lo no bueno. La responde el Kriyador dizyendo: Por ke demandates demi sensya i no demandates de mi rikeza i vidas largas i yo te vo dar a ti “Lev haham ve navon” un korason savyo i entendido. Şelomo Ameleh tuvo merito salamente por el dezeo grande ke tuvo por konprar la sensya. El dezeo grande ke tuvo por la sensya i abandono la rikeza i las vidas largas. Şelomo Ameleh saviya muy bueno ke las vidas i la rikeza sin tener sensya no tyene ninguna valor.
La persona deve de demandar verdadmente la sensya del Kriyador, i kuando la alkanso, tyene el merito de yamarse kon el titolo de SAVYO DE KORASON - HAHAM LEV.
Tambien de la estorya de Yeoşua bin NUN nos enbezamos ke el fue yamado kon el titolo İŞ AŞER RUAH BO. PERSONA - OMBRE ke poseda un esprito. Ke puede resivir las fases de la divinidad. Una persona semejante es pronto a resivir la luz de las fases de la divinidad.
Yeoşua Bin Nun tuvo el merito de pasar por dirijente despues de la muerte de Moşe Rabenu sovre el puevlo Cudyo, solamente por ke ero yeno de el esprito del Kriyador İŞ AŞER RUAH BO. Porke demando del Kriyador la sensya por dirijir a la nasyon.
