Fin la peraşa de Korah, todas las rebueltas del puevlo, era solamente kuando se topavan en apreto i ke les paresiya ke ya estan perdidos. Kualo par el montenimyento kualo por el sufriyimyento en el dizyerto i semejante. Ma ninguno teniya la uzadiya ni se permetiya a vinir kontra Moşe Rabenu. Todos lo amavan i lo estimavan seya par su alta valor seya tambien porke viyan ke el se entregava a la muerte por eyos. En toda okazyon buşkava a afalagar la ravya del Kriyador. Despues del pasaje de los meragelim, ke ya kito Moşe Rabenu la esperansa de entrar a la tyerra de Kenaan i ya la avizo la desizyon del Dyo Poderozo ke todo el puevlo deven murir en el dizyerto. Se afloşo sus amistad kon el i vinyeron asta pensar ke no kale sintir sus palavras i ovedeser sus ordenes. En este tyempo se permete un syerto nombrado. Korah de la famiya de Levi i pelear i kontra dizir a Moşe Rabenu.
Korah, toma kon el a Datan i Aviram de el trive de Reuven i syertas personas del puevlo de ‹srael i un syerto On ijo de Pelet i se azen una konpanya de 250 personas. Se paran kon altiguezo delantre de Moşe i Aaron a pelear. Kon Moşe Rabenu i abandonar sus ordenes.
Moşe Rabenu entendyo sus malos penseryos ke estan pensando ke todas estas ovras son eças a su pareser i no es por komando de Dyos. No tuvo el koraje de kontradizirles akel momento porke no se revoltaran mas negro. Los dize kon palavras tyernas ke aproven i ke agan manyana el servisyo del saumeryo enel templo. El i toda su konpanya i Aaron, ansi viran ken es el santo ke Dyos eskojo en el, Eyos o Aaron?
Vyendo Moşe Rabenu ke estas tyernas palavras no izyeron ningun efeto sovre Korah i su konpanya enpeso a avlarles kon fortaleza, syendo kes sus eskopos no es mas ke por revoltarsen kontra el Kriyador. Mando a yamar a Datan i Aviran ke estavan en sus tyendas por darles a entender sus yero puede ser se repinteran.
Mo eyos no kijeron sintir i le avlaron unas palavras muy kontraryas dizyendoles: No te basto lo ke nos izites salir de la tyera bendiça del Ejipto para matarmos enel dizyerto i tambien te keres sinyoreor sovre mozotros? Los ojos nos puedes tapar ke no veyamos i entendamas tus ovras?
Moşe Rabenu termino de avlar sus palavras la tyerra se avyo i se izo komo una boka i englutyo a Datan i Aviran i a Korah kon sus kazas i todo lo ke teniyan i se fueron todos bivos a la foya i al punto torno la tyera a su estado de antes i se deperdyeron toda esta cente del mundo. Todo el puevlo de ‹srael ke estavan a las doredores enpesaron a fuyir del bruido espantandosen no fueran englutidos i eyos.
Entremyentes abaşo fuego de los syelos i komo a los 250 personas ke se permetyeron de saumar el saumeryo enel templo koza ke no les aparteniya a eyos. El Kriyador enkomendo a Moşe Rabenu ke aga tomar las 250 paletas de kovre ande izyeron soumesyo estas personas. Seya una membrasyon por todo el puevlo ke no se permetan ninguno ke no es del Semen de Aaron a aser karse a sirvir en el santuvoryo.
