La cente ajena ke estavan kon los ijos de İsrael. (Erev Rav) Dezearon munças kozos sin menester. Kozas ke no se puediyan topar mas ke en las sivdades povladas i no en el dizyerto. El puevlo de İsrael sin apartar la diferensya ke ay de eyos a esta cente, i eyos, yoraron dizyendo: Ken nos dava a komer kame? İ enpesaron a rekordar de munças kozas de muy poka enportansa ke teniyan en ayifto debalbes: Myentres ke el mantenimyento ke teniyan en la mano ke era la magna, era una koza muy estimada en su savor i en su vista, en su limpyeza, ke en teniendo esto en la mano no kaliya pensar por unas kozas de muy poka enportansa.
El puevlo se rekorjeron en la puerta de su tyenda, famiyas enteras a yorar por este mal, ke les mankava todas estas kozas ke teniyan en Misrayim en abondansa. Este konporto de la cente le desplazyo munço a el kriyador. Komo se olvidaron tan presto todas sus buendades. Moşe Rabenu se topa en un estado de no pueder azer nada. El pensava ke la kulpa estava en el ke no esta savyendo giyar a el puevlo. El se keşa kon el todo poderozo dizyendo: Ke pekado tuve ke me dates este karga tan pesgada a no pueder suportar. De onde tengo yo karne para dar a komer a esta suma de puevlo. Ke estan yorando dizyendo: Damos karne! Moşe Rabenu roga a el Kriyador ke si lo kere byen ke lo mate, i no vera este mal ke no puede suportarlo. El Kriyador le dize a Moşe Rabenu: Ke por endelantre no va tener el esta kantidad de yugo kon el puevlo. Le enkomendo ke eskojga 70 personas de los savyos de İsrael. Ke son konpetentes de giyar a el puevlo.
El Kriyador les vardar la fuersa ke rijan a el puevlo. İ le vana alivyanar el yugo de Moşe Rabenu. Le diras a el puevlo le dize el Kriyador. Ke se apronten para manyana i komeran karne en abondansa. Tendran de komer fin a un mez. Ma ke sepan ke esta karne les va salir de nariz. İ antes de eskapar de komerla vana murir munços de entre eyos. Moşe Rabenu vyendo ke esta dadiva de la karne va ser por el mal del puevlo. Le roga al kriyador de arepintirse de esto dizyendo: Una vez ke esto es unas vanedades del puevlo. Eyos keren topar unos pretektos.
Moşe Rabenu rekonto a el puevlo ke el kriyador ordena de eskojer 70 persona de los savyos del puevlo de los mas pertenesyentes de todos los apora a el deredor del mişkan. El Kriyador lo favorizo i pozo sovre eyos su profetiziya.
Entre las personas ke fueron eskojidas para esta misyon Aviya dos personas nombrados eldad i medad ke los kualos restaron en el real del puevlo i no fueron delantre del mişkan komo las otras 70 personas. Estos dos personajes ke no les salyo el goral, por esto restoran en el real i no fueron metidos delantre el mişkan. Komo los otros 70 personas. Fueron profetizando, Moşe Rabenu fue avizado de parte su elevo yeoşua ke estan profetizando en el real. El responde dizyendo: Ken dyera ke todo el puevlo fueron profetas komo estas.
El kriyador izo arankar de la mar unas syertas aves nombradas selav “tanto era la muçidumbre ke se espandyo a el deredor de el real. El puevlo estuvo rekojendo dos diyas i una noçe. Malorozamente ke esta Selav fue por el mal del puevlo. Ainda tenyendo la karne en los dyentes mando el kriyador una mortaldad. En el entervalo de un mez muryeron munça cente del puevlo. Por esta razon se yamo este luguar. KİVROT ATAAVA. Tombas de el dezeo.
