En estos diyas, despues de la muerte, de İshak uva una ambrera en toda la tyere de el Ejipto, Paro rey de el Ejipto, vido entre esfuenyos, ke estava en el bodre de el riyo, vido syete vakas, rezyas i syete vakas flakas. Onde las flakas viniyan a danyar a las rezyas se eperto. Despues vido otro un esfuenyo, 7 espigas sostansyozas i 7 espigas flakas. Ke las espigas flakaz engrutian a las espigas sostansyozos. Estos esfuenyos lo deranjo muncho a Paro ma ningunos no pudyeron eksplikar el senso de estos esfuenyos. El ministro de los beverajes ke izo la konosesya kon Yosef, se akodra en akel momento la saviduriya de Yosef sovre los esfuenyos. La dize a Paro ke el konose un mansevo ebreo, ke es maestro en este partikular.
La traen a Yosef enfrente de Paro i el eksplika dizyendo ke va vinir 7 anyos de bondansa a el Ejipto, onde va pueder el Ejipto artar a el mundo entrero. Ma despues de estos 7 anyos va aver una sekura en la tyera. Ma no ay de espantar, si se dirije el paiz, kon sensya i entelijensa los 7 anyos de bondansa ya puede artar a el Paiz i de maz a los vizinos de este paiz.
Esto fue una okazyon, ke el Kriyador, pozo la mano, Yosef iva ser el podestador de Misrayim.
Esto era rodeos del Şem Yitborah a ke se konoskan i se rankontren Yaakov Avinu, i sus ijos, kon Yosef atsadik.
En esta peraşa vemos versetos ke mostran la enportansa ke dyo Paro a Yosef.
Yosef, le dize a Paro; lo ke deves de azer tu, es: de nominar una persona ke va pueder dirijir el paiz en los 7 anyos de bondansa.
Paro: Es ke egziste en el paiz otra persona mas ke ti ke podesta el esprito de Dyos?
İ Yosef devyene segunda persona en el Ejipto, despues de Paro.
