Kon dyes mandamyentos fue Kriyado el mundo. İ ke deprendimyento? Para dizir: i desyerto kon mandamyento uno puedia ser por ser Kriyado salvo, por panarse de los malos ke depeyedren a el mundo ke fue kriyado kon dyes mandamyentos. İ por dar presyo bueno a los custos ke sostyenen a el mundo ke fue kriyado kon dyes mandamyentos. Este paragrafo lo meldamos en el livro Pirke Avot.
Este paragrafo ke meldamos en el sinken pere nos enbeza ke el Kriyador por dar muncha paga a los Tsadikim, a las personas custas, kriyo a el mundo kon dyes dichas, mandamyentos. Ke el puediya Kriyar a el mundo kon una dicha.
Por ke los Tsadikim las personas custas sostyenen a el mundo. Komo dizen nuestros savyos, el mundo se sostyene sovre la ley i sovre el sirvisyo, i sovre la bienfezensya (dicha de Şhimon el custo) i Raban Şhimon be Gamliel dize: Sovre el cuisyo sovra la verdad i sovre la pas el mundo se sostyene.
El mishkan el santuvaryo ke enkomendo el Kriyador a Moşe Rabenu de fraguarlo mezo de Betsalel, senboliza a el mundo. Tambien El Bet Amikdash ke fraguo Şhelomo Ameleh era el mundo de el cudyo, komo dize en el Midrash. Todo lo ke egziste en el mundo egziste en el santuvaryo. Komo meldamos en la perasha de Yitro, en todo luguar onde enmetaresh mi nombre, vendre a ti, i te bendizere. Sigun la eksplikasyon de el sinyor de Rashi en todo luguar onde enmentaresh mi nombre, es el santuvaryo.
El santuvaryo es yamado “Kol Amakom” todo el luguar. İ el santuvaryo es el luguar onde mora le shehina la divinidad. Si el mundo era en estado de el santuvaryo, el materyalismo no podestava ni egzistiya malisya en el mundo, i todos la personas eran custas. Dunke devemos ser custos i amar a la custisya. Komo dize en la Gemara de berahot, de el diya ke se destruyo el santuvaryo, la Tora nos mampara i devemos de estar syempre cuntos kon la Tora,. Kuando egzistiya el santuvaryo la ara el mizbeah onde se aziya los sakrifisyos perdonavan nuestros pekados, oy el pranso ke es ordenado sigun la ley nos perdona. Dunke onde nozotros la yamamos, kon korason kumplido, a el Kriyador el nos responde. Syempre ke nos responda para biyen.
