Si alguna persona se remarkava sovre su kuerpo algunas yagas ke las nombra en la perasha de “Tazria” “Tsaraat”, Lepra, despues ke las egzaminava el Koen, lo apartava syete diyas de la cente. Lo aziya morar el Koen, un sierto tyempo solo. Dita persona, en estando solo se aziya un egzamen de konsensya i bushkava pork e pekado kavzo estas yagas en su kuerpo? Sigun nuestros savyos estas yagas yagavan el kuerpo de el ombre, por kavza de no puederse detener su boka de avlar mal, i kozas ke no konsernan a el.
Siguramente, kuando la persona entendiya su yerra aziya teşhuva, kere dizir, se arepintiya de su yerro, i tornava a el kamino derecho.
El eskopo de el Kriyador de traer a el ombre estas yagas era de kreyar en la persona un buen karakter. Kreyar a el ombre de nuevo. Limpyo i bueno.
Por la persona ke fue yagado es dicho: No puede tokar la santedad, i no puede vinir a el santuvaryo asta ke va kumplir los diyas de su limpyeza. De aki nos enbezamos, la persona deve de saver si no se alimpyo de sus enkoniyos, no deve de vinir a la santedad. A dita persona ke fue yagado, la traian a el Koen. La misyon de el Koen era de bendizir a el puevlo kon amistad. El presigiya la pas i muchiguava la pas i la buendad.
Kon sus buenos konsejos, kon sus dulses palavras lo tornava a el ombre a un buen kamino. En dita perasha meldamos, si sovre la yaga se topava un kaveyo blanko el Koen lo apartava por ke era enkonado. Este verseto de la parasha no kere endikar el ombre malgrado su edad avansada, ke sus kaveyos ya se le enblankesyeron. Si no esta en un buen kamino es ke no esta korekto verso,El Kriyador verso su famiya i verso la cente. No kere dicho, ke estamos enkomendados de parte de muestros savyos. El ombre deve de tornar a el buen kamino, aindo kuando esta en sus fuersas.
Shelomo Ameleh en livro Mişle dize: La vida i la muerte de el ombre esta dekolgada en la alguenga. El ombre si enpleya sus avlas para bueno alarga sus vidas si es a la kontra malarozamente danya sus vidas, tambien danya su salud. El biervo Tsaraat – metsora, ke sinyefika la lepra lo entermeten los savyos; Motsi Ra Kitar kaza feya de la boka, kitar fama mala por su serkano.
Dizen nuestros savyos: Una persona puede danyar a su enimigo kon la espada si esta serka de el ma kon la alguenga lo danya malgrado ke se topa muy leshos de el. Avlar mal kere dizir lashon ara, entra en un grupo de pekados muy fuertes komo sirvir idolaz, avoda zara i verter sangre. Miryam la ermana de Moşe Rabenu se apeno kon yagas de lepra porke avlo por Moşe Rabenu.
Komo sufre el kuerpo de el ombre kon diferentes hazinuras, i la alma de el ombre sufre de hazinuras. David Ameleh en uno de los salmos de teilim dize: “Refaa nafshi ki hatali lah.” Melizina mi alma porke peki kontra ti.
Los dezrepozos, las angustyos ke vyenen sovre el ombre deve de azerlo pensar, i tornarlo a un buen kamino.
Si puedemos entender el buen doktrino de la Tora i de nuestros savyos, estonses vamos a ser bien aventurados, i vamos a tener muncho bueno. Si tienemos buena entisyon, El Kriyador syempre nos ayuda. I nos ayudara syempre.
Amen.
