La perasha “Emor” nos enbeza la enkomendansa de santefikar el nombre del Kriyador. “Kiduş Aşem” komo esta diço: “No esbivlesh el nombre de mi santedad, i sere santefikado entre los ijos de İsrael. Esta enkomendansa es un doktrino ke devemos kumplir, todos nozotros, en kada momente. Sigun “Arambam” devemos de tener la kreyensa, la fey, en el Kriyador i santefikar su nombre.
Vemos en la bibliya, Hananya, Mişhael i Azarya, ke fueron echados a el fuego, por el nombre del Kriyador i fueron salvados kon los milagros, ke izo el Todo Poderozo.
La perasha trata, por la santedad de los Koanim dizyendo ke no deven enkonarsen, en ninguna manera. Nozotros devemos de onorar i santefikar a los Koanim.
En ke manera los onoramos a los Koanim? Eyos suven primer a la Tora. Kuando egzistiya nuestro santuvaryo de aregalarlos, kon los primeros frutos, kon los primeros produktos i kon los primeros kodreros de las ovejas.
El Koen gadol i los Koanim deviyan de kudyar sovre el puevlo de Israel.
La perasha trata tambien, tokante las fyestas cudiyas.
Por el diya de Kipur, diya de las perdonansa, es un diya grande para el puevlo cudyo. El diya ke nos perdona el Kriyador de nuestros dilitos, pekados i reveyos. El Kriyador perdona a akel ombre, ke aze Teşuva ke se arepyente de sus yerros i pekados i mas no lo repeta .
Por la fiesta de Sukot, dize el verseto: En las kavanyas (suka) devesh asentarvos syete diyas, las kozas, la moradas deven ser provizoryas i la suka deve ser vuestras moradas. De este verseto no enbezamos ke devemos saver nozotros i nuestros ijos. En las kavanyes (Sukot) izo morar a nuestras avuelos El sinyor de el mundo kuando nos kito de el Ejipto.
I avlo Moshe i ekspliko, las fyestas a los ijos de Israel. I nozotros en kada fyesta devemos de meldar i enbezar i dar a entender a nuestros ijos los milagros ke izo el Kriyador kon nozotros.
Devemos de konoser los kustumbres (uzos) de kada fyesta en su tyempo.
Tokante a la mitsva de Omer devemos de kontar kuarenta i nueve diyas de la segunda noche de Pesah asta la fiesta de Shavuot, de kompletar syete semanas.
Los Koanim son los ke aserkan a el puevlo cudyo a el Kriyador. Mezo los sakrefisyos oy ke no tenemos el santuvaryo nos santefikan kon sus bendisyones. Kuando egsistiya el santuvaryo los Koanim eran tambien los edukadores de el puevlo i arelumbravan a nozotros kon la luz de la Tora.
