Moşe Rabenu suvyo a la punta del monte de Sinay. El puevlo lo estavan asperando, la ora ke i va tornar, syendo no les avizo la tornada kuando va ser. Moşe Rabenu estuvo en el monte de Sinay 40 diyas. El kuarenten diya era el 17 del mez de Tamuz. El puevlo se despero i les paresyo ke Moshe Rabenu muryo, syendo no tomo kon el ninguna koza de mantenimyento. İ viyan ke no abashava la magna kada diya en el monte de Sinay. Sovre esto se rekojeron todos i vinyeron delantre de Aaron Akoen dizyendole ke les aga un dyo, para ke kamine delantre de eyos syendo Moshe Rabenu el ke los kito del Ejipto, no saven ke es de el, le akonteseriya algun dezartre.
Aaron Akoen ermano de Moshe Rabenu. vyendo el estado de el puevlo, i lo ke demandavan era enposible de azerlo, kijo ganar tyempo, por ke el ya estava siguro ke Moşe Rabenu ya va tornar dize ke traygan todos la orejales de oro de sus mujeres i kreaturas. Aaron Akoen penso ke las mujeres i la kreaturas no vana dar sus coyas. Ma la cente ajena ke eran auzados a la idolatriya no todraron de dar sus coyas.
Aaron Akoen tomo el oro i lo metyo en la lumbre i salyo una forma de un bezero. La cente ke vyeron esta forma de el bezero se fueron detras de sus vanas kreyensos.
Aaron Akoen vyendo este dezastre, kijo a falagar a el puevlo.
A la demanyana uvo un grande dezorden entre el puevlo. Moşe Rabenu, i el Kriyador se ensanyaron a este estado de el puevlo.
Moşe Rabenu ke amava muncho a el puevlo cudyo, roga a el Dyo santo de repintirse de su ravya kon el puevlo cudyo, por amor de Avraam,Yitshak i Yaakov, i tambyen ke no topan de avlar los puevlos ajenos. El Dyo santo kon su buendad se arepyento de su ravya i perdono a el puevlo cudyo.
