El puevlo cudyo arivaron a el luguar nombrado Kadeş Barnea, en los kavos de el dizyerto de Paran arivando a este luguar. Ya estavan muy serka de la tyera de Kenaan, en pokos diyas ya puedian entrar a la tyera prametida. Del Kriyador, i Moşe Rabenu.
El Kriyador le dişo a Moşe Rabenu de mandar doce personas, personas onoradas, Kaveseras del puevlo, uno de Kada trivo, para eskulkar la tyera de Kenaan. Le enkomendo ke la repuesta i lo kevana ver ke se lo digan a el.
Moşe Rabenu izo el komando del Dyo. Tomo doce personas uno de kada trivo, i los mando a la tyera de Kenaan dizyendoles, ke eskulkaran la tyera, si es buena o no, la cente de ai ke tal son? Fuertes o flakos, pokos o munços. İ las sivdades ke moran si son en kastelyadas. O son avyertas. Les dyo a entender por ke kamino se ivana ir.
Los eskulkadores, salyeron a el kamino sigun les enkomendo Moşe Rabenu. Kuando arivaron a la tyera de Kenaan, rodearon i eskulkaron la tyera entera myentres kuarenta diyas. A la tornada arankaron de los frutos ermozos, aronkaron un razimo de uvas muy grande ke fue menester de yevarlo entre dos personas. Arivaron al dizyerto de Paran onde estavan todo el puevlo de İsrael. En diya 8 d’Av.
Los doce es kulkadores kuando arivaron, en luguar de irsen onde Moşe Rabenu i avizarle todo lo ke vyeron, se van onde el puevlo, les kontan todo lo ke vyeron les amostran los frutos ke truşeron de ai.
Despues se van onde Moşe Rabenu i delantre todo el puevlo avlan unas palavras ke izyeron des korajar a todo el puevlo dizyendo: Ya fuimos a la tyera ke mos mandates, la tyera es muy ermoza. Ke kore por sus kaminos leçe i myel.
Ma es enposivle de apatronearmos de eya. Syendo ke el puevlo morador de la tyera es un puevlo muy fuerte ke el no se deşa venserse... Las sivdades son muy grandes i enkastelyadas ke es muy difisil de prenderlas.
Kalev uno de los eskulkadores los aze kayar, toma la palavra dizyendo: Sera muy fasil de eredar la tyera. Malorozamente el puevlo se des korajo. Este akto desagradavle kavzo a el puevlo de morar 40 anyos en el dizyerto.
