Rengrasyar sovre las maraviyas.
En la Peraşa “Tsav” meldamos sovre el korban ke se aziya por rengrasyar a el todo poderoza ke se nombrava Korban Toda. Korban Toda se aziya por rengrasyar a el Kriyador por las buendades i las mersedes, ke nos aze el todo poderozo sovre este sujeto. Raşi eksplika dizyendo: Los ke vyenen de kamino de mar, los ke tornan de un dizyerto, los ke salen de la pisyon, i el hazino ke se milizino, deve de dar loores a el sinyor de el mundo.
Este sujeto esta mansyonado tambien en el livro de Teilim dizyendo: Rengrasya a el Kriyador por sus mersedes, por sus maraviyas ke aze a el ijo de ombre i ayeges sakrifisyo de rengrasyamento.
La persona deve de rengrasyar por todas las maraviyas ke aze el kriyador kon nozotros. Nuestros savyos dizen, por kada momento ke respiramos devemas de rengrasyar a el Kriyador. Komo Avraam Avinu enbezava a la cente dizyendo; Bendizi a el ke vozda vuestro mantenimyento. En la Amida en el paragrafo ke meldamos “Modini” dizimos.
Sovre las maraviyas. Ke azes kon mozotros kada diya, por las maraviyas i las buendades ke nos azes kada momento. Tadre manyana, i medyo diya.
Los ijos de İsrael kuando salyeron del Ejipto. Pasaron la mar, kaminaron en el dizyerto, salyeron del kativeryo, se milizinaron de la flakeza del esklavaje sovre este pasaje rengrasyaron nuestros avuelos a el Kriyador. Tanbien nozotros alavamos a nuestro Kriyador en la fyesta de Pesah por las maraviyas ke izo el Şem Yitbarah a nuestros avuelos. Kuando salyo el puevlo Cudyo del Ejipto, el Kriyador akonpanyava a eyos. Komo meldamos en la Tora i el Kriyador kaminava delantre de eyos, los giyava en el Kamino.
Malgrado ke Dyos estava kon nuestros padres en la solidura de Mistrayim, no teniyan espanto de nada komo esta disho en el verseto. El Kriyador va gerreyar por vozos, vozos espera sus maraviyas. Kontaron i alavaron Moşe Rabenu i el puevlo a una mente la poesiya ke meldamos kada diya en la orasyon de la manyana.
O no tenemos la posibilidad de ayegar sakrifisyos. Ma tenemos la posibilidad de orasyonar i de dar loores a es Şem Yitbarah, por sus buendades ke nos aze kada momento. İ de seer fideles a el.
