En la medya noche del 15 de Nisan, mando a dizir Paro a todo el puevlo cudyo ke se topavan en la tyera de Goshen ke eyos eran liberos, ke puedian salir de su pais i al punto los cudyos ke ya estavan prontos esperando esta ora, se rekojeron todos kon prisa en el kartier Ramses i a la manyana, en el kinze Nisan, salyeron todos los cudyos de el Ejipto kon grande koraje i alegriya despues de aver estado su deftos en este pais 210 anyos.
La suma del puevlo ke salyeron de el Ejipto era 600 mil almas de ombres de 20 anyos para ariva fin a 60 anyos endesparte de mansevos manko de 20 i vyejos mas de 60 anyos i de mujeres i kreaturas. İ akel diya salyeron tambien muncha cente de otros puevlos ke estavan en el Ejipto i se acuntaron kon los cudyos.
El puevlo Ejipsyano, konosyendo a los kavos la grande encustisya ke kometyeron kon los cudyos en luguar ke tantas buendades ke vyeron de el, i vyendo ke ay Dyo en los syelos ke paga a kada uno sigun su ovra, kijeron afelagarsen un poko kon eyos, i les fueron regalandolo muncha plata i oro i piedras presyozas munchas kozas valotozos. İ les azion demandar todo lo ke tenian menester para darles en tal de afalagarlos. İ ansi salyeron los cudyos de Mistrayim. Kon muncha rikeza sigun se la prometyo el todo poderozo a Avraam kuando le avizo lo ke teniya ke arivar a sus ijos salyendo del Ejipto no se olvido Moşe Rabenu de tomar kon el sirkelyo de Yosef sigun lo enkomendo antes de su muerte. Los grandes del puevlo tambien tomaron kada uno el sirkelyo de los 11 ermanos de Yosef los kapos de los Shevatim i se los yevaron kon eyos.
