Las dos perashiyot nombrados Tazria Taara nos enbeza lo bueno ke trae a la persona el avlar bueno, de entremeterse kon palavras de ley de mitsvot i no vanedades. El ombre tyene paga buena de parte del Kriyador kuando aze lo bueno i la derecho.
Pero, a la kontra si auzo la alguenga a avlar mal por ken kere ke sea komo se yama en la lingua Ebreo LASHON ARA , palavras non buenas i raportar avlas ke puede traer danyo a la cente i a el mundo, la pena es muy fuerte.
Nuestros savyos eksplikan el verseto de el livro Mishle de Shelomo Ameleh. La vida i la muerte esta dekalgado en la alguenga. Si la persona enplea su avla para bueno alarga su vida. A la kontra malorozamente se danya su vida i su salud sontrae asi mismo angusya.
El biervo “tsaraat” lepra ke meldamos en las dos perashiyot de esta semana la eksplikan nuestros savyos “Motsi sem ra” el ke kita fama mala kere dizir el ke avla mal por su serkano se apena kon esta yaga.
Dizen nuestros savyos: La espada puede danyar a el ke esta serka de el ma el ombre kon su alguenga puede danyar tambien a los ke estan leshos. Lashon ara es un defekto de los mas grandes igual a sirvir idolos. Miryam la ermana de Moshe Rabenu se apeno de parte del Kriyador. Salo por ke avlo kontra Moshe Rabenu. De aki se puede entender ke karar de grande es el defekto de avlar kontra una persona .
La persona kuando se milizinava de la lepra yevave a el santuvaryo onde el Koen dos palombikas por azerlas korban. Este akto enbezave a akeya persona ke mas no va chuchulear komo las pasharikos i va guadrar a su alguenga de avlar mal.
Komo lo rogamos del Shem Yitbarah en la orasyon de la amida tres vezes al diya.
Mi Dyo! guadra a mi alguenga de avlar mal i a mis lavyos de avlar mintiras.
Komo meldamos en el livro Teilim ke dize David Ameleh: Ken es el varon ke envelunta vidas? Estima a su vida i kere ver bueno? Ke guadre a su alguenga de mal i a sus lavyos de avlar mintiras. Tirate de lo negro, aze syempre lo bueno, bushka la pas i presigela.
