İrena Sendler es una grande heroina ke salvo 2500 bebes, i kreaturas antes de la deportasion a los kampos de konsantrasion.
Sendler fuyo las kreaturas del geto de Varshova, i eskondyo sus identidades en djarros de vidro enterrados debasho de un arvole de mansana, en la guerta de su vizino.
İrena muryo a 98 anyos, en el anyo 2008. ‘Mi padre me ambezo ke devemos de savlar kada persona, endepedente de su relijion i nasionalidad’ disho İrena. ‘No kero ke me yamen heroina porke no tengo la konsiensia repozada. Puediya savlar mas munchas kreaturas’.
En el anyo 1939, kuando los almanes entraron a Polonia, İrena teniya el posto de administratora en el departamento de bienfezensia del governo, en Varshova. Eya era responsavle de todo modo de ayuda a los proves de la sivdad.
Kuando los Nazis empesaron a maltratar a los judyos, İrena empeso a i trokar sus nombres, i darles nombres kristianos para pueder guadrar sus orijines.
En el anyo 1940, la situasion empeso a agravarse kuando las otoridades almanes konstruieron el geto de Varshova. 440,000 judyos (ke era un tresio de la populasion de Varshova), fueron transferados de sus kazas al geto, ande fueron ovligados a bivir en 16 blokes de kazas, i una pared konstruida al enterno. Este geto era komo una prizion avierta, ande los almanes emprizonavan los judyos, antes de embiyarlos a la muerte, en el kampo de konsantrasion de Treblinka. En el geto, kada mez, sinko mil personas se muriyan de hazinura i de ambiertura.
1942 era el anyo de la Solusion Final. 250.000 judyos fueron transferados del geto a Treblinka.
İrena se sintyo ovligada de ayudarles. Se enkrivio a una organizasion de ayuda del governo, i se izo el shef de la seksion de kreaturas. El mas grande problem era komo entrar al geto. A la fin, reusho a tomar una permision ofisial del departamento de hazinuras kontajiozas. Kada diya, se estava indo al geto komo ke estava tomando prekosiones para ke las hazinuras no se ekstenden afuera del geto.
İrena teniya vente i kuatro asistentes. A las vezes, eskondiyan una kreatura debasho de la kama de un hazino en transferandolo a la ambluansa. Otras vezes, los fuyiya a la eglizia detras del geto. A los bebes, los metiya en validjas u kashas. ‘La mas difisil koza era de konvenser los padres i madres’ disho İrena. ‘En mis esuenyos, dainda oygo los yoros de las kreaturas kuando los tomava de las manos de sus madres’.
‘La majorita de las kreaturas fueron embiyadas, kon sus muevas identidades, a los orfilinatos, u los dimos a las famiyas kristianas. Dinguna famiya no refuzo de tomarlos. A estas kreaturas, les ambezimos de azer orasiones kristianas, en kavzo ke los topen en sus lugares eskondidos’.
En el anyo 1943, los almanes se ambezaron de las aktividades de İrena, i la metieron a la prizion. Ma la organizasion ande İrena lavorava, reusho a savlarla. İrena fue eskondida finke la gerra eskapo.
Munchas de las kreaturas salvadas no se akodraron de sus madres i padres, i kontinuaron a bivir kon sus famiyas muevas. Kinyentas de estas kreaturas izieron aliya duspues de la gerra.
Kuando estas kreaturas se engrandesieron, no se olvidaron de sus salvadora. En el anyo 1983, İrena fue dekorada en İsrael, komo ‘Djusta entre las Nasiones’, ke es el mas grande onor ke el puevlo judyo da a los non judyos. En el anyo 2003, en la Polonya postkomunista, İrena fue nominada por el Premio Nobel de Pas.
‘El mundo puede trokar si ay amor, tolerensia, i humilidad’ disho İrena. Eya teniya estas tres kozas en abondansia.
