I avla el Kriyador a Moshe: Avla a los ijos de Yisrael i tomen por mi apartadura, de todo varon ke su korason enveluntara. Tomaresh mi apartadura. I esta es la apartadura ke tomaresh de eyos, oro i plata i alombre.
Shelomo ameleh dize en el livro de mishle Tomad mi kastigeryo i no plata, mijor es de tomar un kastiyeryo bueno ke vale mos de el oro i la plata. Kon este verseto nos kijo enbezar Shelomo Ameleh a nozotros mas vale un buen konsejo ke el oro i lo plata. El konsejo i el kostigeryo se deve resivir kon alegriya i no kon haraganedad. Kuando va azer la person una venkomendansa de el todo poderozo lo deve de azer kon entisyon buena i alegriya. Afirmar una mitsva semejante tyene grande valor.
Mismo tyempo la Tsedaka. La dadiva ke aze la persona a los menesterozos la deve de azer kon una alegriya grande ke el Kriyador lo ayego, i le dyo la posibilidad de azer la ayego, i le dyo la posibilidad de azer lo mitsva de dar Tsedaka. La Tsedaka ke se aze por razon ke fue aforsado no tyene tanto valor.
Por esta razon la perasha enpesa kon estos bivervos. “Toma para mi apartadura lo ke vaja apartar para ovras de bienfezensyas se deve apartar a nombre de el Kriyador.
La Tsedaka ke va azer el ombre, lo deve de saver el Dyo, i el ke esta dando.
Devemos de enkorajar a la djente de azer dar Tsedaka. La enkomendansa la mas grande es: dar Tsedaka, i azer dar a otros. En el Talmud dize: Mas valorozo es, la persona ke da i aze dar atros. La entisyon de el primer verseto de la perasha es: dize el Kriyador. Si apartash la apartadura por fraguar el mishkan el santuvaryo, ke es nombrado tyenda de plazo por mi nombre, me tomash a mi entre vozotros. İ yo moro entre vozotros.
La ora ke se para un menesterozo a el lado de una persona, dize el todo poderozo yo esto a el lado derecho tuyo komo eskrive en el livro de Teilim.
El se para a la derecha de el menesteroz. El Kriyador nos dyo la Tora en Monte de Sinay, por amostrar ke el se topa en luguar ke ay djente ke estan estudyando la Tora, i mismo tyempo djente ke estan afirmando la enkomendansa de dar Tsedaka. Kon la Tsedaka sontefikamos el nombre de el Kriyador. El ke ayuda a los menesterozos resive grande rekonpensa de el Kriyador. Si pensamos el ayudo ke azemos a los ovras, a los menesterezos de ando lo estamos azyendo? De lo ke nos da a nozotros el Kriyador. Devemos de tener veluntad buena por ayudar, a el ken es de menester, komo lo meldamos.
I el oro i la palata apartyene ami dize Ashem Tsevaot.
