En el livro Shemot la fragua del Mişkan el santuvaryo okupa un luguar muy grande. Kuatro perashiyot son apropyadas para esta ovra. En las perashas Vayakel i Pekude vemos ke se termino la fragua del santuvaryo i ya esta pronto por azer el estrenamyento.
La enkomendansa de guadrar el Şabat, en la perasha Ki Tisa vyene despues de la enkomendansa de la fragua de el Mişkan. En la perasha de Vayakel vemos enprimero el Şabat i despues la fragua del Mişhkan.
En la perasha de Ki Tisa despues de la nominasyon de Betsalel i Aaliav komo kapos maestros, nos enkomenda el Kriyador la grandeza de el diya de Şhabat. El sinyor de Rashi eksplika dizyendo malgrado ve vaja ser okupados kon vuestras echos, el Shabat no volo vaja olvidar. Antes de enkomendar la enkomendansa de la fragua estamos enkomendados de santefikar el Shabat. Ibn Ezra lo entrepeta este verseto dizyendo: Malgrado ke somos ovligados de azer el komando de el todo poderozo tambien somos ovligados de no ezbivlar el diya santo de Shabat, komo lo develope Rabi Moshe ben Nahman. Sej diyas vaja lavorar en la fragua del Mishkan i no el syeten diya, porke es santo para el Kriyador. Tambien el diya de Shabat va ser santo i para vozotros. En el livro Tora Temime dize: ayegar sakrefisyos era un dover grande i spiritual en el tyempo de el Bet Amikdash, i tambien se aziya korbanot en diya de Shabat. Por ke razon la fragua del Mishkan no fue permetida en Shabat? La repuesta es ansi. Los korbanot tyenen un tyempo fikso por ayegarsen, si paso su tyempo se puede baldar, de ayegar este sakrifisyo i se puede pasar una enkomendansa de la Tora pero, por la fragua de el Mishkan no fue taksado un tyempo.
El Talmud konta la ora ke Moşe Rabenu estava entremetido en el lavoro del Mişhkan no se akonsejo kon los dirijentes del puevlo.
Les desplozyo muncho a los dirijentes. Los dirijentes de el puevlo enpesaron a traer piedras presyodas ke eran menesterozas para el Mishkan.
En el livro Mishle, Shelomo Ameleh dize: Pensamyentos, kon konsejos se konfirman tambien en el livro Yehezkel ,vemos i bushkaran vizyon de el profeta i konsejos de los viyejos de estos versetos entendemos ke Moshe Rabenu deviya akonsejarse kon los kapos de la nasyon.
Moşe Rabenu teniya razon. El plano de el Mishkan el todo poderozo se lo amostro a Moshe Rabenu. Todo ya estava pronto de parte de el Kriyador. Una koza ke esta enkomendada de parte de el Kriyador no es derecho de akonsejar de afirmarla o no.
Ma vemos en el Talmud ke el Kriyador se akonsejo kon Moshe Rabenu por la nominasyon de Betsalel. Moshe Rabenu le responde a el Kriyador tu si lo ves petenesyente yo no te puedo dizir nada le dize el Kriyador malgrado todo va akonsejata i kon el puevlo i demandales el puevlo responde dizyendo El Kriyador, i tu si lo vesh pertenesyete a Betsalel por fraguar el Mishkan nozotros ke puedemos dizir.
