En la peraşa ‘Ahare’ nos enbeza el sirvisyo ke aziya el Koen Gadol en el santuvaryo en el diya de las perdanansas Yom Kipur. Arambam la mişna la eksplika dizyendo: kuando el Koen Gadol tornava a su kaza despues ke kumplyo su sirvisyo, lo akonpanyavan asta su kaza i aziya un banketo a sus keridos porke tornova a su kaza sano i rezyo.
El banketo ke aziya el Koen Gadol era por ke no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de las perdonansas, no puediya salir bivo de el santuvaryo. İ por esta razon es ke el Koen Gadol no deviya alargar su orasyon, por no azerlos dezesperar a el puevlo.
El banketo ke aziya el Koen Gadol en su kaza, le enteresava a su persona, el Koen Gadol deviya ser kazado. I orasyonar por su famiya i no solo por si. Antes de el diya de las perdonansas se deviya apartarse de kaza i santefikarse. Kuando ya izo su sirvisyo ke ya fue resivido de parte de el todo poderozo, tornava kon alegriya a su kaza, onde su famiya.
El sirvisyo ke aziya el Koen Gadol en diya de Kipur era por santefikar a el mundo el este. Tomar la santedad de las alturas i abaşarla a el mundo onde bivimos nosotros. Ansi en tornando el Koen Gadol a su kaza trayiya kon si la santedad a su kaza i a el mundo.
Semejante a este sujeto lo rankontramos en Rabi Akiva ke es diço por el. Entro kon nos i salyo en pas. Rabi Akiva estudyo todos los sekretos de la Tora. Este estudyo no lo izo solamente para si salo sino por enbezarla a el mundo entero.
El eskopo de la kreasyon de el mundo es de azerle una morada a el Kriyador en este mundo por traer la santedad de las arturas, a el mundo el este.
En el livro ‘Tana deve Eliyau’ meldamos: Ansi dize el Kriyador a İsrael, yo kualo dezeo de vosotros? De amarnos unos kon otros, de onorarvos unos kon otros. Komo el Kriyador se apiada kon todas las Kriyansas, i nosotros devemos de apiadarmos de unos a los otros, seya moralmente seya materyelmente. Kada persona es presyozo verso el Kriyador, por ke es su kriyansa, i nosotros devemos apresyar a todo persona por ke todos somos Kriyansas de el Todo Poderozo. Malgrado todos nos defektos el Kriyador syempre esta entre nosotros.
Aşohen itad betoh tumotam.
