Despues del pasaje de los merazelim ke ya les kito Moshe Rabenu lo esperansa de entrar a la tyera bendicha, i ya les avizo la desizyon del Todo Poderozo ke todo el puevlo deven murir en el dizyerto, se aflosho sus amistad kon el i vinyeron asta pensar ke no kale sintir sus palavras ni ovedeser sus ordenes. I es eneste tyempo ke se permete un syerto nombrado KORAH de la famiya de Levi, a salir a kontra dizir a Moshe Rabenu.
Korah, toma kon el a Datan i Aviram sus amigos de la famiya de Reuven i munchas personages del resta del puevlo. I un syerto on ijo de Pelet, i se azen una konpanya de 250 personas, todos grandes personajes de ombres afamados de entre el puevlo. Se paran kon altigueza delantre de Moshe i Aaron i toman a barajar kon Moshe Rabenu i azer abandonar todos sus ordones.
Eyos toman a kontradizirle sovre 3 puntos muy emportantes. Prima; por lo ke nomino a su ermano Aaron por grande sirvitor del Kriyador, (Koen Gadol) a el i a sus ijos. I defendyo ke ningun ajeno ke kera ke seya pueder aserkarse asta esta ovra.
Segunda, por ke aparto el trivo de los Leviyim por sirvitores del santuvaryo en luguar ke este sirvisyo apartenia asta estonses a los behorot de kualun ke trivo ke fuera. I tresera, por la ke se determino de dar la preferensya al trivo de Yeuda en luguar ke aparteniya a Reuven ke era el primera de los doce trivas. Sigun el orden del Dyo el Trivo de Yeuda posava a delantre de todos los trivos en todas la oras. Sovre estos puntos i sovre el mal selo ke tuvo Korah, ke el keriya ser el Koen Gadol ke peleyan kon Moshe Rabenu por ke tyene ke senyorearse sovre el puevlo del Dyo i meter ordenes sigun se pareser.
Moshe Rabenu, entendyendo sus malos penseryos ke estan pensando ke todos estos ovras son echas a su pareser, i no es por komando del Dyo alto. No tuvo el koraje ke kontra dizirles akel momento por ke no se reboltaran mas negro, les dize kon palavras tyernes ke aproven i ke agan manyana el servisyo del ketoret ke es el saumeryo en el templo. El i Aaron i vezan ken es el Santo ke el Kriyador eskojo en el, eyos o Aaron. Vyendo Moshe Rabenu ke estas tyernes palavras no izyeron ningun efeto sovre Korah i sus konpanyoros, enpesa a avlarles kon fortaleza, syendo ke sus penseryo no es mas ke por vinir kontre el Kriyador i mando a yamar a Datan i Aviram, ke estavan en sus tyendas por darles a entender sus yerra puede ser se repyenteran. Ma eyos no kijeron sintir.
El Dyo Santo ordena a Moshe Rabenu ke se aparte de esto kompanya i les amostra en un momento una fuerte mortaldad en el puevlo.
Moshe rabenu roga a el Kriyador a ke balde esta mortaldad i ke abate su ravya.
