Ansi dize Moşe Rabenu: “İ rogi a el Kriyador en akel tyempo, dizyendo, Sinyor de El Mundo rogo azeme pasar i vere la buena tyera, a kel monte bueno i el Levanon, se ensanyo el Kriyador i me disho basta no me avles mas sovre este sujeto.”
Ansi enpesa la perasha de Vaethanan. Moshe Rabenu tyene un dezeo de ver la tyera prometida a nuestros avuelos.
Por tanto El Kriyador ya le disho ke el no va entrar a la tyera santa. El pastor fiel Moshe Rabenu estuvo 40 anyos cuntos kon el puevlo Djudyo en el dizyerto. Ya arivaron a el momento ultimo ke ya estan prontos a entrar a la tyera de Kenaan.
Malgrado todo Moshe Rabenu aze 515 orasyones, ke le aga una mersed, ke se apiade de el a lo manko de ver solo esta tyera prometida. Por ke Moshe Rabenu ya savia muy bueno ke El Kriyador es grasyozo i piadozo de este kavzo. Deprenden nuestros savyos i dizen en el Talmud:
“La orasyon es mas valutozo afilu de azer echas buenas. Ansi le responde el Kriyador, suve a la punta de Pisga i alsa tuz ojos al oksidente, i al norte, i al sud, i al oryente, i mira kon tus ojos por ke no pasaras este Yarden.”
Moshe Rabenu por ke le kumpla El Kriyador esto dezeo, izo munchos dialogos, aprovo de orasyonar, rogo ke El Kriyador le kumple este dezeo. Le disho a El Kriyador; “permete me de ver la tyera.” Penso entre si, si le via permeter de verla puede ser se apiaderiya i la aziya entrar.
Ma alkavo entendyo Moshe Rabenu, mas no le aprovechara, ni orasyones ni rogativos la setensya ya fue dada. Ma por tanto devemos de saver de no kontentarmos kon una sola orasyon si no ke devemos de pujar las orasyones. Por kavza ke El Kriyador dezea las orasyones de los custos. İ tambien ke la orasyon es mas valutozo i grande de las echas buenas ke se azen sin orasyonar.
