La semana pasada selebrimos la fiesta de Hanukah. Esta fiesta es nomada la fiesta de laz luzes. Este anyo en muestra komunidad se selebro komo la fiesta de la muzika. Savesh puedeser ke en enpesando de la Fransia, munchos paizes selebran el 21 de Djunio (el dia el mas largo) komo el dia de la muzika. Si vos topash en Paris puedesh asistir a munchos konsertos en los lugares publikos.
Las Talmud Toras de todas las partes de muestra sivdad selebraron la fiesta de Hanuka en las kehilas. La komunidad de Gokturk organizo una tadrada kon muzika. Komo munchos miembros mansevos de muestra komunidad moran en esta parte de la sivdad, tienen el mazal de formar grupos de muzika. Mizmo Karen es una de la kantaderas de este grupo.
Lunes la noche, el Neve Shalom organizo una nochada ande los partisipantes tuvieron mizmo la oportunidad de komer. Buket Bahar i Cenk Rofe dieron un konserto ke fue muncho apresiado por el publiko. Mierkoles el muevo grupo “retretados mansevos” organizo un konserto kon muzika elektronika.
Yo tuvi el mazal de partisipar a la fiesta ke tuvo lugar en el Templo Ashkenazi. Es por la primera vez ke oyi el nombre del kompozitor i pianisto David Ezra Okonşar. Kuando meldi el artikolo en el suplemento del Şalom fue una surpriza para mi de oyer el sukseso de este pianisto tan famozo.
Muestro amigo Robert Schild reelmente es muy kapache para organizar todo modo de konsertos o teatros. I el tuvo la kapachita de organizar este konserto ke fue realizado por la primerea vez.
En esta nochada sintimos 8 rapsodias Ebraikas kompozadas por el kompozitor el mizmo. Todas estas rapsodias tenian ayres de kantikas relijiozas o folklorikas judias o ebraikas . “Donna Donna” ke es una kantika de un muzikal en yidish, “Hava Nagila” ke fue kompozada en el anyo 1918. “Hora Mamtera” i “Nigunim”, ke es una melodia de las dansas publikas, fueron las tres rapsodias ke no tuvieron raporto kon la muzika liturjika. “Shalom Aleichem” ke fue formada sovre la melodia de Shalom Aleihem ke es kantada noches de shabat; “Kol Nidre” ke es la melodia la mas empresyonante del dia de Kipur, “Purim” ke fue inspirada sovre las dos kantikas de Purim “Chag Purim” i “Ani Purim”. La rapsodia final era “Hanukkah” ke era muy sinyitifikativa para esta noche de Hanukkah.
Vos kero enformar ke el sinyor Okonşar mizmo izo un CD sovre las Rapsodias Ebraikas i vos konsejo de sintirlo.
Hanuka se termino ma no la fiesta de la muzika. Diya de alhad en el diaryo Hürriyet aviya un artikolo del sinyor Doğan Hızlan ande mos estava enformando de un muevo CD realizado por la piyanista kompozitora Renan Koen. El CD tiene el titolo “trasaz piedridas, rekuerdos sekretos”. En la entroduksion, muestra amiga Karen Şarhon esta eksplikando el viyaje de la lingua judeo-espanyola de los 1492 asta oy. I kreo ke los kantes fueron enspirados de la muzika de esta lingua.
Vos auguro diyas kon muzika i anyada buena a todos.
