La semana pasada mi artikolo tenia komo titolo “La libertad de ekspresyon i el terrorizmo”. Komo empesi a eskrivir sovre el terrorizmo i todo modo de matansinas no eskrivi nada sovre la libertad de ekspresyon. Esta semana kere dar una definision para la libertad de ekspresyon.
Anyos antes kuando la demokrasia no egzistia la djente era ovligada de pensar komo sus lideres i azer lo ke los obligavan. Oy en dia todo troko. Las personas pueden eksprimir sus ideas komo keren. Ma siguramente ke ay limitos en estas ekspresyones. Mi opinion es ke no tenemos derecho de dar danyo a otras personas. La ley es la primera para limitar i protejar los derechos de los otros. El segundo limito son las tradisyones i las kostumbres. Ma este punto es diferente de pais en pais. Una karikatura sovre un profeta es achetado en una demokrasia evropea ma es kritikado en munchos paizes. Las personas ke son kontra una ley, una aplikasyon o son kontra siertas ideas tienen el derecho de azer manifestasyones i demonstrasyones en tomando permisyon ofisial o no; dependiendo de las leyes del pais.
Las reaksyones de los governos i de la polisia ke es dirijado por el ministro no son las mizmas en kada pais. Kuando se empesa kon djopes, haftonas i gazes, la libertad de ekspresyon empesa a ser limitada. Los jornalistos son las personas ke dan lo mas muncho emportansa (o son ovligados de amostrar ke no kedan sin echo) a la libertad de ekspresyon. Pueden eskrivir todo modo de ideas sin dar danyo a otras personas. Los patrones son uzados de pagar kuando los jornalistos pagan indemnitad dospues de un procheso ke uno de sus jornalistos no lo gano.
La koza la mas terrivle es la reaksyon kon fuersa o kon haftonas i punyos o la reaksyon komo matar los ke no pensan de la mizma manera. Por la felisidad de la umanidad devemos de defender todo modo de libertad de ekspresyon sin dar danyo a las otras personas i devemos opozarmos a todo modo de terrorizmo.
