El 24 de febrayo va mos a komemorar ofisiyalmente (por la primera vez en la istoria de la Republika Turka) la eksplozyon del vapor (si se dize vapor) Struma i de la muerte delos 769 pasajeros djudyos lo mas de nasyonalidad Romena ke tuvyeron el mazal de topar la moneda bastante para suvirsen a este vapor; i el dezmazal de suvirsen a un vapor ke era para transportar solo bestias i no personas. Lo mas eran mansevos, edukados; avia munchos medikos, avokatos, enjenyeres…
Dospues de las leyes muy rigorozas de 1941 los djudios de Romania tantaron de fuyirsen del payis por la Mar Preta kon motores ke no eran sanos. En 1940 el vapor “Salvador” fue despedasado en Silivri en los pinyaskos. La mitad de los pasajeros se muryeron en la mar yelada de la Marmara; siertos tuvyeron el mazal de salir a la tyerra. La komunidad Djudia de Estanbol los ayudo bastante. Savemoz ke enel anyo 1941 el vapor “Mefkure” fue batireado en la Mar Preta. El “Struma kon sus 780 pasajeros se espartyeron de Konstanze (Köstence) el 12 de desembre 1942. El mal de vapor alkanso a Estanbol en tres dias dospues de unas kuantas roturas (arıza). Ma fue travado a Ahırkapı por un remorkeur Turko. Kon una bandiera amariya de karantina no desharon los pasajeros ke pueden komunikar de toda manera. El motor roto fue dado a reparasyon por la komunidad Djudia. No teniendo bastante komida i medikamentes tenian munchos hazinos en el vapor. Los pasajeros kerian irsen a la Palestina por treno o par tierra (karayolu). Es dospues de munchos kontaktos ke los diridjentes de la komunidad Djudia – el sinyor Simon Brod; el sinyor Rifat Karako – alkansaron a ayudar los pasajeros de “Struma” en trayendo todo modo de komanya i medikamentes. Meldi ke el sinyor Hayim Kohen (protokol) ke tuve el mazal de konoserlo era el maz mansevo entre los ke ayudaron kada dia a los ke se topavan en el Struma. Loz İnglezes disheron ke no los keremos; los Turkos disheron no kale ke se vayan: i todos disheron otras kozas ma dingun de estas desizyones eran para salvar estas almas fuyendo los Nazis i el Holokosto. Del vapor pudyeron salir el direktör del Mobil Oil el sinyor Martin Segal, su mujer i su ijo (salvados por el sinyor Vehbi Koç-el mas famozo endustriel del pais en este tiempo); la sinyora Salamowitz ke pario al Ospital Or Ahayim i 5 otras personas ke tenian vizas para entrar en la Palestina. A la fin los İnglezes achetaron a dechar pasar por tierra los 70 kriaturas ke se topavan en el “Struma”. Esta vez los dirijantes Turkos no achetaron i 72 dias dospues; kuando resivieron un telegerafo del lider sionisto amerikano Wise ke reusho a tomar 200 vizas de entrada para la Palestina los polises turkos vinieron al vapor kon un remorkeur i dospues ke se aharvaron kon los pasajeros; kortaron la ankora del vapor i lo desharon sin motor en la Mar Preta kon el remorkeur. La desgrasya afito a la demanyana kuando un torpido Ruso izo eksplozar el vapor kon sus 769 pasajeros. Es solo el sinyor David Stoliar ke reusho a sovrebivir. Lo enbiyaron doz meses dospues a la Palestina ma el bivio la mas grande partida de su vida en los Estados Unidos. Ke sus almaz repozan en pas i ke la umanidad! no veyga otra vez un dezastro semejante.
