Edirne (en turko) ; Andirne (en djudezmo); Andrinople (en fransez) son los nombres dados a esta sivdad del Imperio Otomano (kapital antes del anyo 1453; anyo ande fue konkisto Estambol por el Sultan Fatih i de la Turkiya. Edirne fue una sivdad muy emportante para los djudyos del Imperio Otomano. Eya fue la sivdad ande fue fondada la primera eskola de l’Aliansa . Eya fue la sivdad la mas emportante ande siyenes de rabinos ortodokses ma no fanatikos fueron edukados. Puedemos ver en la istoria de los djudios del Imperio Otomano ke la mas grande partida de los Hahambashis (Gran Rabinos) son orijinarios de Edirne. Esta sivdad fue una sivdad ande todo modo de minoridades komo Djudios, Bulgaros i Gregos bivian en pas.
En el anyo 1905, en el sentro de esta sivdad un fuego muy grande kemo todas las sinagogas ke se topavan aryentro de las fortifikasyones. (Se dize ke avia tredje o kinze sinagogas.) Ya savesh ke ande ay un djudyo deve de aver dos sinagogas una para ir i la otra para no ir! Kreo ke era la mizma koza en Edirne i kada uno devia de desidarse ande devia de irse para orasyonar kada dia.
Este fuego fue una okazyon para la populasyon djudia de Edirne para unirsen i topar la posibilidad de azer la orasyon todos en djuntos. Kon el ferman del Sultan Abdulhamit 2 (en el Imperio Otomano por todo modo de permisiones, el Sultan devia de eskrivir una permision o sus ideas para ke este fakto o esta fragua sea realizada), los Djudios de esta sivdad kon un arkitekto famozo fransez France Depré reusheron kon grande difikultades materyales de fraguar una sinagoga de 2.746 m2 semejante a la sinagoga de Viena ke fue destruida durante la Segunda Gerra Mundial. La inogurasyon de la Grande Sinagoga de Edirne fue realizada en el anyo 1907. I malorozamente en los anyos 1970, dospues ke los djudios d’Andirne fuyeron de esta sivdad (no se si es el biervo djusto ma la ekspesion es kompletamente djusta porke se fueron en poko tiempo i no tornaron a la sivdad d’orijin ande teniyan el simeteryo i todo modo de erensya.) Ya se ke dizenaz de personas ke vijitaron esta sivdad i la sinagoga toparon todo modo de dokumentos en la guerta de la sinagoga i en las kayes.
Era el anyo 2004, unos kuantos mezes dospues ke devine prezidente de muestra komunidad; el dia ke el prezidente Amerikano Bush estava vijitando muestro pais estavamos asperando en la Universidad de Galatasaray ande un ministro orijinario de esta sivdad me demanda deke no restoramos la Sinagoga d’Edirne. Le respondi ke estavamoz prontos a ayudarlos ma este edifisio malorozamente (para mi porke la mas grande partida de los djudios turkos no pensan de esta manera) no era muestro dospues el anyo 1992, porke no kijimos azer eleksyones en esta sivdad i las fondasyones irregulares son dirijadas por la direksion de las fondasyones .
Un dia dospues me telefonan de Edirne i me dan siertas eksplikasyones. Una semana dospues empesi a lavorar kon mis amigos i partikolarmente kon el arkitekto Rubi Asa ke izo reelmente un lavoro muy emportante para la restorasyon de este edifisyo. Dospues de los planos ke aparejimos, la Direksion de las Fondasyones izo munchos esforsos para azer esta restorasyon. Kale ke rengrasyemos los sinyores Yusuf Beyazıt i el Dr. Adnan Ertem, direktores de esta Direksion. Mi iluzyon era ke la avyertura por la segunda vez ke se realize djusto syen anyos dospues en el anyo 2007. Ma malorozamente esta avyertura se esta realizando ocho anyos dospues.
El 26 de este mez, una inogurasyon va ser realizada en Edirne i reelmente si keresh partisipar a estas seremonias devesh de embiyar un e-mail al adreso : [email protected]. Este dia puede empesar de la demanyana o de midi fina la tadre. Los Edirnelis, los Estanbollis, los Çanakkalelis i los djudios orijinarios de todas las sivdades estash envitados a esta seremonia…
En unas kuantas semanas si lo akseptan, vos va dar novelas para konsiertos ke se van realizar en esta sinagoga-muzeo.
