En la perasha ‘AHARE’ nos enbeza el sirvisyo ke aziya el Koen Gadol en el santuvaryo en el diya de las perdonansas Yom Kipur. Arambam la mishna la eksplika dizyendo; “Kuando el Koen Gadol tornava a su kaza despues ke kumplyo su sirvisyo, lo akonpanyavan asta su kaza, i aziya un banketo a sus keridos por ke tornava a su kaza sano i rezyo.”
El banketo ke aziya el Koen Gadol, era por ke no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de las perdonansas, no puediya salir bivo de el santuvaryo. I por esta razon es ke el Koen Gadol no deviya alargar su orasyon, por no azerlos dezesperar a el puevlo.
El banketo ke aziya el Koen Gadol en su kaza, le enteresava a su persona. El Koen Gadol deviya ser kazado, i orasyonar por su famiya i no solo por si. Antes de el diya de las perdonansas se deviya apartarse de kaza, i santefikarse. Kuando ya izo su sirvisyo ke ya fue resivido de parte de el Todo Poderoso, tornava kon alegriya a su kaza onde su famiya.
El sirvisyo ke aziya el Koen Gadol en diya de Kipur era por santefikar a el mundo el este. Tomar la santedad de las altura i abasharla a el mundo onde bivimos nozotros. Ansi en tornando el Koen Gadol a su kaza trayiya kon si la santedad a su kaza i a el mundo.
Semejante a este sujeto lo rankontramos en Rabi Akiva ke es dicho por el, ‘entro kon pas i salyo kon pas’. Rabi Akiva estudyo todos los sekretos de la Tora. Este estudyo no lo izo solamente para si solo si no por enbezarlo a el mundo entero.
El eskopo de la kreasyon de el mundo es de azerle una movada a El Kriyador en este mundo por traer la santedad de las arturas a el mundo el este.
En el livro ‘Tana Deve Eliyau’ meldamos: “Ansi dize el Kriyador a Israel, ‘yo kualo dezeo de vozotros? De amarvos unas kon otros, de onorarvos unos kon otros”. Komo El Kriyador se apiada kon todas las kriansas, i nozotros devemos de apiadarmos de unos a los otras, seya moralmente seya materyalmente. Kada persona es presyozo verso El Kriyador, por ke es su kriyansa, i nozotros devemos apresyar a toda persona por ke todos somos kriyansas de El Todo Poderoso. Malgrado todos nos defektos El Kriyador syempre esta entre nozotros. Ashohen itam betah tumotam.
Kedoshim
el Todo Poderozo noz esta enkomenda dizyendo: “Devesh ser santos, por ke yo so santo.” Sovre este sujeto kontenua la perasha: “Kada uno i uno devesh tener temor de vuestra madre i de vuestro padre, i guadrar mis Shabatot”. Kada persona i persona deve tener temor de su padre i de su madre. En los dyez komandamyentos esta enkomendansa es dicho “Onora a tu padre i a tu madre”. Vemos ke padre esta sitado antes de madre. Es muy byen savido jeneralmente las kreaturas tyenen myedo de padre mas ke la madre.
Por esta kavza vino La Tora en la perasha de Kedoshim nos enbezo el orden del Kriyador dizyendo devez de tener espanto de tu madre i de tu padre. Pozo a la madre antes de el padre. Kere dizir la onor i el myedo ke vasa tener a tu padre deveser igual a la onor i al myedo ke vasa tener a tu madre.
La kontenuasyon del verseto es ansi: “devesh de guadrar a mis Shabatot. Es defendido de esbivlar el Shabat”. En la kreasyon de la persona egziste tres faktores El Kriyador-el padre i la madre. Por esta kavza es ke vino en un verseto, la santedad de El Kriyador, i el konporto ke devemos tener verso nuestros jenitores. Devemos ser personas korektas, i azer syempre lo ke es custo. Meldamos en la perasha, delantre de uno ke no esta atinando no pozes un entranpeso. Es muy siguro kavzas la kayida suya.
Esto se puede entender i en este senso: alguna persona ke vino a tomar un konsejo en algun sujeto, ke el inyora deves de aklararlo dizirle lo ke es lo custo i no entronpeserlo.
A el lavorante ke ya eskapo su lavoro devista deves de pagar su paga i no azerlo sufriyir. Deves de estimar a tu kopanyero komo tu mismo.
Estas enkomendansas ke meldamos en la Tora trae a la konpanya pas, repozo i trankilidad.
