I avlo El Kriyador a Moshe en el Monte de Sinay dizyendo: “Avla a los ijos de İsrael i diles: Kuando vineresh a la tyera ke yo vos dare, algara la tyera Shabat a el todo poderozo. Sej anyos sembraras tu kampo i sej anyos apodaras tu vinya i akojeras tu renuevo. En el anyo seteno avra Shabat de olgansa a la tyera Shabat a El Kriyador. Tu sembres tu kampo i apodes tu vinya. El Shabat de la tyera vosh sera para komer, a ti i a tu syervo i a tu syerva i a tu kuatropea, i a la bestya ke uvyere en tu tyera.”
El eskopo de todas las enkomendansas es, de azermos akodrar ke somos ovligados de ovedeser i afirmar las dichas de El Kriyador.
En ovedesyendo la persona las enkomendansas de El Kriyador, para myentes ke el Santo bendicho el podesta sovre el mundo entero. El ombre deve de saver ke el patron de este mundo es El Kriyador de el mundo. En la bondansa no devemos de olvidarmos, la bondansa de onde nos vino. En afirmando los fueros i los cuisyos, damos loores a El Kriyador ke nos rengrasyo kon muncho bueno.
Kuando el sinyor de el mundo nos da un kanpo, devemos de orarlo i sembrarlo komo esta dicho en Tora. En arekojendo el produkto de la tyera devemos de deshar los bodres de el kanpo para los menesterozos. Lo ke se olvido en el kanpo mas no apartyene a el, si no para los menesterozos no deve de tornar a tomarlo. No deve de olvidarse de aregalar a el Koen, a el Levi para ke tenga la bendisyon de Dyos.
La perasha nos enbeza todo lo ke es de menester de azer para ke tengamos el merito de alkansar la bendisyon de El Kriyador bendicho su nombre.
Behukotay
*Si anduvyeresh en mis fueros, i guadrares mis enkomendansas, i las azeresh, yo dare vuestra luvya en su tyempo, i la tyera dara su ermoyo, i el arvol del kampo dare su fruto. İ komeresh vuestro pan a la artura, i moraresh siguros en vuestra tyera, i dare paz en la tyera, i dormiresh i no avra ken vos espante. İ are kitar las alimanyos malas de la tyera i por vuestra tyera no pasara espada. Vos muchiguare, i afirmare mi firmamyento a vozotros i andare entre vozotros. İ sere vuestro Dyo, i seresh mi puevlo yo so vuestro Kriyador.”
La Tora nos esta enkomendando de aplikar los enkomendansas ke nos enkomendo El Kriyador. El Kriyador nos esta prometyendo ke nos va dar nuestro mantenimyento syempre. “Si andovyeres en mis fueros” son las primeros byervos de nuestra perasha; kere dizir: si vajaser buenos i onestos i vos vaja enforterser en el estudyo de la ley vos va dar syempre luvyas de bendisyon. Tambien va pozar la pas entre vozotros ke no digash ya tenemos un pan de komer, i muncho bueno para la pas i el repozo nos manka. Por esta kavza vos esto prometyendo ke yo vos va dar i la paz para ke tengash el repozo. Yo vo estar syempre entre vozotros, no solamente en este mundo tambien en el paradiso.
En este mundo nos va dar artura i repozo por ke estudyamos la ley santa, i la aplikaremos ansi ke tendramos merito, merito de eredar el mundo vinedero. “A mis enkomendansas guadrares”: este verseto nos embeza dizyendo la ardor ke devemos de tener para aplikar las enkomendansas dizyendo kuando me se va fadar de azer tala enkomendansa. Devemos de ser prontos en las enkomendansas i kuando va vinir el tyempo de azerlos si ninguna ezitasyon aplikarlas.
Ansi vos vo adar las luvyas en su tyempo, vaja tener syempre la bendisyon del Kriyador. Vaja arekojer vuestro produkto. Entre estas todos bendisyones El Kriyador va pozar mi morada entre vozotros. Yo va morar entre vozotros por el merito ke estash enfortesyendo la ley i afirmando mis enkomendansas dize El Todo Poderozo.
