Kerikos lektores. Ay anyos i panyos ke los Sefaradis asperan la nasionalidad d’Espanya; pais de ande fueron ekspulsados kinyentos i ventitres anyos antes. Mizmo kuando estava en la redaksion del Şalom un sierto tiempo arebivyeron una ley ke ekzistia para los sud amerikanos i los sefardis ke puedian resivir la nasionalidad Espanyola si biven dos anyos en Espanya. I siertos empesaron a alkilar kazas en Espanya i viajar por Andorra i Fransia para ke no sepe ke no estavan biviendo en Espanya. Kreo ke siertos reusheron a resivir la nasionalidad. En la mizma epoka por la djente ke no eran sefaradis o sud amerikanos este tiempo era sinko anyos.
Anyos dospues un djudio sefardi turkano ke se topava en la Espanya por un kongreso de Rotaryenes en avlando kon una persona ofisial de alto nivel le disho ke ay una ley kon la permision del rey i se puede dar la Nasyonalidad a los Sefardim mizmo si no biven en Espanya. I reusho a ser Espanyol kon su famiya. Ma en este tiempo no tenia derecho de konservar la nasyonalidad Turka i todos los ke resivieron la nasyonalidad Espanyola afirmaron un papel ande diziyan ke no tenian otra nasionalidad. I todos los avokatos espanyoles i turkos toparon un echo muevo. Todos estavan kontentes; los ke davan los dies mil euros, i los ke tomavan los dies mil euros. En el empesijo todo kamino muy bien ma dospues kon la burokrasia espanyola i los problemas de la Venezuela de Chaves en primero fueron los djudios sefardis i mizmo los kristianos de Venezuela ke tuvieron el derecho de resivir la nasionalidad.
Anyos dospues los Portugezes empesaron a lavorar sovre una ley ke fue achetada ay unos kuantos mezes i van a dar a los sefardis la nasionalidad Portugeza si las alkunyas son achetadas komo orijinarios del Portugal. I para empesar no demandan de avlar el portugezo ke kreo ke es diez vezes mas difisil ke el Espanyol. Komo me plaze muncho los Fados Portugezes me vo a los konsiertos (dos, mizmo tres vezes al anyo) ke se realizan en muestra sivdad. Malorozamente es imposivle para mi de pueder entender las palavras. Porke kuando vijitash el Brasil ya puedesh entender lo ke esta eskrito. Parese muncho al Espanyol ma kon la prononsiasion es una desgrasia. Komo devesh de realizar esto? En primero devesh de tomar un dokumento del Gran Rabinato komo ke sosh Sefaradi. Dospues devesh de pasar en kontakto kon la Komunidad de Lizbon o de Porto para provar ke vuestra alkunya tiene relasyones kon el Portugal. Por egzempyo mi alkunya “Ovadya” fue achetada por la komunidad de Porto. (portuguesenationality@comunidade_israelita_porto.org). I vozotros puedesh demandar sovre vuestra alkunya. Dospues tenesh otras formalidades ke devesh de azer en la embashada Portugesa, mizmo en Turkia. El prezidente de la Komunidad de Lizbon ke es un amigo del Kongreso Djudio Evropeo, el sinyor Jose Carp Ulmann no fue tan pratiko komo la komunitad de porto i dio este echo a los espesyalistos jenealojikos.
Si tornamos a la Espanya, el Senato Espanyol acheto la ley ke devia de pasar este mez komo fue aprometido. Ma mos salio un pipino. Estan demandando ke devemos de saver la lingua Espanyola i las kustumbres de la Espanya. Puede ser normalmente komo los otros paizes Evropeos tienen el derecho de meter la ovligasyon de saver la lingua del pais. Ma no deve de ser la mizma koza para los sefardim. Mi opinion es ke puede ser tienen el derecho de demandar ke los ke keren la nasionalidad ke avlen el Djudeo-Espanyol. I muestro sentro puede azer todo sus esforsos para ambezar kon el Sentro Cervantes la lingua de muestros avuelos komo esto eskriviendo. Esta semana va azer un esforso para avlar kon el Konsul Espanyol i el Direktor de Cervantes para eksplikar los problemes.
Oguro a todos ke reushen a ser achetados a la Nasyonalidad Espanyola o Portugeza…
