Kada demanyana en indo me al echo kon el otobus de mar (en enverano kuando esto en la Büyükada) devo de meldar el diaryo Hürriyet ke oy en diya kreo ke es la gazeta la mas liberal i demokrat en Turkiya; ande es muy difisil de eksprimir sus ideas de una manera klara. I por koensidensya todos los anunsyos de funerales topan lugar en este diaryo. Djueves kuando empesi a meldar la gazeta vide ke el sinyor Yılmaz Benadrete mos desho la buena vida i sus funerales se van a realizar el mizmo dia. Yılmaz Yermiya reelmente era un ombre muy orijinal. Si lo yamavas kon la alkunya de Benardete (komo se yama mizmo su ermano Davut i su famiya) al lugar de Benadrete komo se nombrava devias de oyir una konferensya.
En los anyos 1990-92 kuando la komunidad Djudia de muestro pais selebro los kinyentos anyos de la venida de los Djudios en tierras Otomanas el sinyor Benadrete ke era miembro del Kongreso Sefarad Evropeo i del Kongreso Sefarad Mundial (no se si egzisten oy en dia i mizmo si egzisten no se lo ke sinyifikan por el mundo Djudio) fue prezente en kada okazion. En esta epoka el sinyor Hatchuel Toledano orijinario de Maroko i sivdadino de Espanya era el prezidente (malorozamente moz desho la vida en el anyo 2011 kuando teniya 71 anyos) del Kongreso Sefarad Evropeo. (Kuatro anyos antes kuando se organizo el Kongreso Sefarad Mundial por el Ministerio de los echos etranjeros de Espanya en Madrid fuimos envitados una noche por la Komunidad de Madrid i el ijo de Hatchuel Toledano era el vise prezidente de la Komunidad i tuvimos la okazyon de avlar sovre su padre).
Kon Yılmaz Benardete kaji dos anyos kada Shabat, dospues de la seduta (toplantı) de la publikasion del Şalom lo tapava asperandome i diskutiamos sovre diferentes sujetos sovre la Komunidad, ke de vez en kuando s’eskapava en peleandomos (no era muy difisil de pelearse kon Yılmaz). I eskapavamos las diskusyones serka de las syete o de las ocho. Para siertas personas no era fasil de pueder diskutar kon el sinyor Benadrete; ma el viajava muncho en esta epoka i savia lo ke se pasava en diferentes sivdades de la Evropa o de las Amerikas. Komo era muy fasil para el de ser muy intimo kon la djente en poko tiempo fue miembro del Kongreso Sefarad Evropeo i kreo dospues Mundial.
Yılmaz keria ser dirijente de muestra komunidad ma komo no era un ombre muy fasil i no se puedia detener i devia dar kada punto sus ideas no fue achetado por los dirijentes.
Yılmaz Benadrete konosiya la Relijion Djudia , era un ombre kultivado i posedava una biblioteka muy ancha i muy rika. Mizmo unos kuantos mezes antes kuando mos enkontrimos kon la Sinyora Anita; su mujer; ke es reelmente una “Hanımefedi” me disho ke Yılmaz i eya keren azer dono la bibloteka ke tienen para ke los miembros de muestra Komunidad i los bushkadores profiten de esta rikeza.
Yılmaz era reelmente Turko i era reelmente Djudio. Normalmente uno ke es muy Djudio no puede ser muy Turko o Turkofil. Ma el era una eksepsion. El no era solo un buen Djudio i era un buen Sefarad. Mizmo fue kandidato para las eleksyones del Parlamento Turko en la epoka de Özal (ke era primer ministro kon el Partido liberal ANAP ke tuvo un grande sukseso dospues de la revolusyon militar en 1980).
Un sierto tiempo Yılmaz fondo una asosiasion Sefarad i siertas personas fueron miembros de esta asosyasyon ke no turo muncho. Me olvidi de indikar una otra partikularidad del sinyor Benadrete. El era orijinario de la sivdad de Çanakkale (Dardanelles) i era orgolyozo de ser orijinario de esta sivdad. Anyos antes izo munchos esforsos para organizar kada anyo tures para vijitar esta sivdad. No se si es kon sus esforsos o no ma oy en dia kada anyo se organiza un viaje i se pasa un Shabat en el kal de Çanakkale i este anyo va ser muestro dover de echar una ashkava en la memoria de Yılmaz Yermiya Benadrete. Ke su alma repoze en pas.
