Kuando eskapa el mez de agosto en Estanbol es el empesijo del invierno. Siertas eskolas empesan el primer dia del mez de Septembre. Los ke van a pasar a la fin de la anyada un egzamen para entrar al liseo o la universita ya no tienen mas tiempo para englenearsen ni mizmo para tomar suluk. Malorozamente en Turkia tenemos un sistem charpeado para entrar a las eskolas - los liseos - i las universitas. Oy tenemos sienes de universitas. Ma malorozamente no tenemos bastante personas de sensya para ambezar a estos mansevos ke frekuentan las universitas. Una grande partida de estas universitas fueron fondadas por siertas fondasyones. No se komo reushen a mantener estas eskolas i estas universitas. Politikamente el govierno esta avriendo universitas en kada sivdad, mizmo en munchos kazales (kasaba). Les paresyo ke estamos en los Estados Unidos ande tienen mas de ocho mil universitas i esto es una de las mas grandes endustrias del pais. Eyos ganan en primero de la moneda ke pagan los padres de los elevos. Dospues kontinuan a ganar en eskojendo las kavesas briyandos. (Kuando era elevo en la Universita Teknika d’Estanbol estudiando elektronika, empleavamos siertos livros publikados en los Estados Unidos i no tuve el mazal de topar un livro eskrito por un halis Amerikano - el eskrivano tenia un nombre indiano, japoneso, chineso, mismo turko ma no un amerikano nasido en este pais. En muestro pais mizmo los ke dirijan el pais o la sivdad no dan emportansa a las personas de sensia i no les viene al tino de demandar konsejos. No savemos lo ke la Munisipalidad d’Estanbol aze kon las medras ke kitaron del Kuşdili. (Tenemos problemes kon el rio chiko Kurbağalıdere ke es serka de Kadiköy-Haydarpaşa ande una grande partida de los lagumes de esta partida d’Estanbol koryen aya - ke suzyedad!) Dos jurnalistos apanyaron el vapor echando las medras en la mar de Marmara. No pensan mizmo komo los jornalistos, ke pueden tomar ideas de los akademikos ke lavoran sovre estos sujetos. Es en la televizion ke me ambezi ke kaliya sekar esta suzyedad i dospues kuvrir kon kal (kireç)i enterrarla. Malorozamente no estamos dando emportansa mizmo a los ke meresen.
Kon el empesijo del invierno, el trafik d’Estanbol ke era mas repozado en siertas partidas de la sivdad en enverano empeso a azdearse (azmak) mizmo dia de lunes. Vamos a ver lo ke vamos a travar invierno entero.
Este anyo dospues de Kipur, tenemos kuatro dias de Bayram (Fiestas Muzulmanas - esta vez es la Fiesta del Kodrero - Kurban Bayramı). I todos empesaron a organizar viajes a los paizes estranjeros o a diferentes rejiones del pais. No ay kedar repozadiko en kaza. Oy en dia empesaron a organizar viyajes para “gourmés”(personas ke s’entienden de buenas komidas) o para “borrachones” tures de vinyas ande se arekoje las uvas para azer vinos i en kada paso se ofre diferentes vinos para ke los partisipantes merken unos kuantos bokales del vino ke les plazio. Ay unos kuantos anyos ke los viajes a las islas gregas estan muy “en vogue” (muy popular). Mizmo los gregos estan muy kontentes de ver los Turkos al lugar de los Sirianos o los Irakianos fuyendosen a la libertad a las Evropas. Este enverano sienes de miles de personas aprovaron a irsen a los paizes evropeos para la libertad. (La mas grande fuitina – kaçış - fue del norte de la Afrika para la Italia i de la Turkia para las islas Gregas). I miles de personas fueron aogados en la mar, en los kamyones i en todo modo de medyo de trasporto. Esto va ser mas terivle kon el empesijo del invierno.
Kon el empesijo del invierno o lo mas djusto del otonyo vamos a topar mas munchas aktividades muzikales i artistikas. Uno de los mas emportantes va ser el Bienal d’Estanbol ande una partida va ser realizada en la Isla de Prinkipo – Büyükada. Tengo una invitasyon para djueves ande va ser prezentado todas las aktivitades realizadas en la Isla.
Inviernada buena.
