La semana pasada me telefonaron de la “Asosyasyon de los Amigos del mupak” en demandando si ya puedemos ayudarlos para una nochada ke estan organizando.
Esta asosyasyon ke organiza aktividades seryozas esta vez desidieron de organizar una nochada en el Klub de Moda ke es uno de los mas renomados klubes sosyales d’Estanbol kon el tema “las komidas de las minoridades - kreo relijiozas” ke biven dainda en Estanbol. Los gregos ke son la baza de los pransos de ordovres (mezeler) van a ser kreo el elemento el mas emportante de esta nochada. Oy en diya los Ermenis Turkos tienen una populasyon de sesenta mil personas i se pensa ke en Estanbol biven buen karar de Ermenis ke vienen de la Armenia. Del punto de vista ekonomiko komo la Armenia no es en buena situasyon; mujeres kazadas vienen para lavorar komo dammas de akompanyamento para las personas aedados, komo enŞrmyera, mizmo komo mosa ke aze todo el echo de las kazas. I son kontentes kon lo ke ganan. Oy en diya el kuarter ande mora lo mas de Ermenis - en Pangalti, Feriköy i Kurtuluş - es posivle de topar restoranes i mezedjis - botikas ande se vende kezos, sosisones, pishkados afumados (dumanda pişirilmiş-füme) i todo modo de mezes (los Espanyoles los nombran tapas) - ke gizan o venden espesyalidades de los Ermenis komo topik i otras kozas… Los djudios tienen dos diŞkultades. La primera es ke los djudios muncho tiempo no se enteresaron kon las komidas para azer un echo. Dospues kuando empesaron, la kasherut fue un koste muy emportante. Un ombre relijiozo de la kasherut deve de kontrolar komo se esta gizando i si todo esta djusto del punto de vista kasherut. I esto es un koste. Savemos ke no es muy fasil de topar un restorante en la Büyükada (Isla de Prinkipo) ande se puede komer shoarma (döner); lahmadjunes i kebapes. Kada anyo la komisyon ke es responsavle de la Kasherut deve de konvenser a lo manko un restorante para ke den el servisio de la kasherut.
Kasherut no kere dizir solo komidas Sefardis. Dainda los Djudios ke biven en Turkiya gizan siertas komidas sefardis en sus kazas. Vos devo de kontar tres mezes antes en un viyaje de komidas ‘’tour gourmet” en Toskana mos diyeron bruchettas (revanadas de pan kon una koza ensima): avas kon espinaka … Los otros miembros del tour ke no eran djudios no entendieron lo ke komian i les konti la komida sefardi “avas kon espinaka” ke se giza dainda en muestras kazas. Todos komemos las borekas de berendjena o de patata, las bulemas ke se venden en İzmir en todos los ornos i los yaman “boyoz”; todo modo de tapadas; almodrote de berendjena o almodrote de kalavasa ke lo nomavamos “kalavasucho”# en muestra kaza son dainda komidas de masa ke se gizan. Las zarzavates se gizan de una fason diferente ke se giza en el mupak alaturka. Las komidas son mas dulses i tienen kaldos diferentes. Todos konosemos las kashkarikas, el armiko de tomat, los kuartos de berendjena, los ravikos (de espinaka o de pazi)… En la kozina Sefardi ya tenemos diferentes modos komo se giza las albondigas de karne o de zarzavates (albondigas de prasa, de berendjena, de espinaka), kucharikas de berendjena, reynadas de sevoya o chuşetikos…
Muestra amiga Karen esta en los Estados Unidos, en Los Angeles para un konserto i eya mashallah giza bueno i konose las komidas sefardis. Ma para esta noche mos demandaron un bayle o un kante sefardi. No se si las danses son sefardis ma esto seguro ke las kantikas son. I demandi a Karen si pueden kantar unas kuantas kantikas kon İzzet. I acheto.
Para la komida kreo ke la Sinyora Ceni Franko – si se topa en estos diyas en Estanbol – va ser la mijor gia (rehber) para los gizandones (ahçı) del klub.
Kreo ke en esta aktivitad se va azer una demonstrasyon de una komida sefardi. I kreo devemos de ofreser (ikram etmek) esta komida a los ke estan partisipando a esta nochada.
La komida sefardi puede ser mas renomada si un restorante de una valor emportante reushe ekonomikamente a mantenerse en gizando komidas sefardis.
