Entre todos los ijos de Yaakov, el mas savyo entelijente de todos era Yosef el primer ijo de Rahel i su padre, seya por su entelijansa, seya por ke era regalado de su madre lo amava i lo akerensyava del fondo de su korason, mes ke a todos sus ermanos, i en sinyal de su amistad le izo una kamina de una ropa muy fina i muy ermoza, lo ke no izo a ninguno de sus ijos.
Vyendo esto, los ermanos de Yosef, entraron en selo kon Yosef i lo aboresyeron muy muncho.
Yosef, a un ke era muy savyo i entelijente, syendo ke era muy mansevo, se konteniya un poko sovre sus ermanos. Vyendo de una parte ke el era mas entelijente ke eyos, i de otra parte la amistad ke le mostrava su padre mas ke todos sus ermanos.
En este enterval se sonyo Yosef dos suenyos, los kualos demostravan ke el teniya ke ser sinyor i podestador de sus ermanos, i el no se travo de kontarlo a su padre i a sus ermanos.
Este komporto de Yosef no izo mas ke pujar el selo i la aboresyon de sus ermanos kon el.
Un diya estando los ijos de Yaakov pasentando sus ovejas en Shehem komo sus uzo, kedaron mas tadre en el kampo i no vinyeron a kaza en su ora.
Yaakov pensando no seya ke uvo de nuevo alguna rebuelta kon la cente de Shehem, le dize a Yosef ke vaya a traerle enformasyones.
Yosef a un ke ya saviya ke sus ermanos lo aboresiyan, no refuzo el komando de su padre i se fue para Shehem.
Sus ermanos ke lo vyeron de leshos vinir solo onde eyos, les pujo mas akeya ora el selo i la aboresyon, se detirmenaron de kitarlo del mundo.
Sovre el konsejo de Reuven, uno de los ermanos de no matarlo kon sus manos, lo echaron a un pozo ondo vaziyo ke aviya en akel kampo. Despues de deznudarlo i kitarle la kamiza fina ke le izo su padre, en sinyal de su amistad, i todos los yoros i rogativas de Yosef a sus ermanos fue sin ningun provecho.
Estando Yosef en el pozo paso por ai merkaderes ke vinian de Midyan i los ermanos lo venden a Yosef, i lo yevan a el Ejipto.
